Սիրիայի նախագահ Բաշար Ալ- Ասադը չի այցելել երկրի հյուսիսային մայրաքաղաք Հալեպ: Այս մասին հաղոդում է շիական «Հըզբոլլահ» խմբավորման կայքը՝ «Ալ- Ինթիկադը»՝ վկայակոչելով Դամասկոսի տեղեկացված աղբյուրին:
Հաղորդագրության մեջ «սուտ» է անվանվում երեկ լիբանանյան «Ալ-Դիյար» թերթի տարածած այն տեղեկությունը, որ իբր Ասադը ժամանել է Հալեպ՝ սիրիական բանակի մարտական ոգին բարձրացնելու համար, և հրամայել է քաղաք լրացուցիչ զորքեր ուղարկել: Թերթը գրում էր, որ Ասադը Հալեպ է այցելել գլխավոր շտաբի զեկույցին ծանոթանալուց հետո, որում քաղաքում տիրող իրավիճակը գնահատվում էր որպես «ծանր, հատկապես վերջերս Սուկ-Ալ-Մադինա» շուկայում տեղի ունեցած հրդեհից հետո»:
«Երկրի նախագահը կարող է այցելել ռազմական գործողությունների գոտի կա՛մ բանակի մարտական ոգին բարձրացնելու, կա՛մ հաղթանակի, կա՛մ ռազմական գործողությունների դադարեցման և վերականգնման շրջանի սկզբի մասին հայտարարելու համար»,- ասել է «Հըզբոլլահ»-ի աղբյուրը:
Մինչդեռ, աղբյուրը նշել է, որ «մեկը մյուսի հետևից հաջող ռազմական գործողություններ իրականացնող սիրիական բանակի բարոյական ոգին ի սկզբանե բարձր է և բարձրացնելու կարիք չի զգում»:
Հաղորդագրության մեջ ասվում է, որ նման լուրերի տարածումը նպատակ ունի ստեղծել այնպիսի տպավորություն, որ Հալեպում սկսվել են «վճռական մարտեր», ինչպես որ դա պնդում են Սիրիայի ազատ բանակի ներկայացուցիչները:
Հալեպը Սիրիայի՝ նշանակությամբ երկրորդ քաղաքն է և նրա տնտեսական մայրաքաղաքը: Քաղաքն ունի 2.5 միլին բնակչությունը: Քաղաքի վրա վերահսկողությունը հսկայական ռազմավարական նշանակություն ունի ինչպես Ասադի ուժերի, այնպես էլ ընդդիմության համար:
Այս պահին, ըստ ԶԼՄ-ների, սիրիական զորքերը վերահսկում են քաղաքի երեք քառորդը, սակայն դեռ չեն կարողացել արևելյան հատվածից դուրս քշել ընդդիմության զորքերին, որում հաշվվում է մոտ 18 հազար մարդ:
