Սիրիական պետական հեռուստաընկերությունը սուր քննադատության է ենթարկել ՀԱՄԱՍ խմբավորման առաջնորդ Խալեդ Մաշաալին այն բանի համար, որ վերջին շրջանում նա հանդես է գալիս գործնականում Սիրիայի վարչակարգի և Բաշար Ալ-Ասադի դեմ: Հեռուստաընկերությունը ՀԱՄԱՍ-ի առաջնորդի այդ դիրքորոշումը պաշտոնական Դամասկոսի նկատմամբ անվանել է «անշնորհակալ և դավաճանական»:
Ինչպես հաղորդում է «Էխո Մոսկվի» ռադիոկայանը, արևմտյան փորձագետները նշում են, որ Բաշար Ալ-Ասադի և ՀԱՄԱՍ-ի միջև հարաբերությունները սկսել են փոխվել դեռ մեկուկես տարի առաջ, երբ սկսվեց ապստամբությունը: Սկզբում ՀԱՄԱՍ-ը չեզոքություն էր պահպանում, սակայն հետո՝ մոտավորապես 2012 թ. սկզբից, խմբավորումը սկսեց Սիրիայի ժողովրդին ժողովրդավարության և բարեփոխումների կոչ անել: Հենց այդ ժամանակ էլ խմբավորման գրասենյակը Դամասկոսից տեղափոխվեց Կատար, որը ֆինանսական և ռազմական աջակցությոն է ցուցաբերում Սիրիայի ընդդիմությանը:
ՀԱՄԱՍ-ի ղեկավարության մեծ մասը, այդ թվում ինքը՝ Մաշաալը, որն իր պաշտոնը լքում է տարվա վերջին, այժմ ապրում են Եգիպտոսում՝ «Մուսուլման եղբայրների» հովանու ներքո:
