Սեպտեմբերի 18-ին Բրազիլիայի բժշկական ասոցիացիայի դահլիճում տեղի է ունեցել երկրի հեղինակավոր լարային եռյակ, ՀՀ մշակույթի նախարարության ոսկե մեդալի դափնեկիր «Տրիո Իմաժեսի»` Հայաստանի անկախության օրվան նվիրված համերգը: Համերգն ուղեկցվել է Երևանի մասին պատմող լուսանկարչական ցուցահանդեսով:Այս մասին հայտնում են ՀՀ ԱԳՆ մամլո գրասենյակից:
Սեպտեմբերի 21-ին Սան Պաուլոյում ՀՀ Պատվո գլխավոր հյուպատոսությունը կազմակերպել էր ընդունելություն` Հայաստանի անկախության օրվա առթիվ: Ելույթներով հանդես է եկել Գլխավոր պատվավոր հյուպատոս Տկն. Հիլդա Բուրմայանը, Հայ առաքելական եկեղեցու վարչական խորհրդի ատենապետ, պրոֆեսոր Ա. Մանիսաջյանը, ցուցադրվել են Հայաստանի մասին պատմող կինոժապավեններ:
Սեպտեմբերի 23-ին ՀԲԸՄ սրահում կազմակերպվել է ընդունելություն` անկախության 21-րդ տարեդարձի առթիվ, որը համընկել է ՀԲԸՄ հիմնադրման 48- ամյակի հետ: Պատվավոր հյուրերի շարքում հանդիսությանը ներկա գտնվեցին Բրազիլիայի ամենանանշանավոր քաղաքական գործիչներից մեկը՝ երկրի առողջապահության նախկին նախարար, Սոցիալ Դեմոկրատական կուսակցության առաջնորդ ժոզե Սեռռան, որն իր ելույթում շնորհավորել է հայ ժողովրդին և, մասնավորապես, բրազիլահայությանը` պատմական մեծ իրադարձության առթիվ` հայտարարելով, որ ինքը եղել է և կմնա հայության իղձերի իրականացման պաշտպանների առաջին շարքերում:
Սեպտեմբերի 26-ին երկրի խոշորագույն «Սան Պաուլո մշակութային կենտրոնի» Տրիանոն սրահում երկրորդ մեծ համերգով հանդես եկավ «Տրիո Իմաժես» եռյակը, որի ընթացքում ներկայացվել են Արամ Խաչատրյանի, Առնո Բաբաջանյանի և Ալեքսանդր Հարությունյանի ստեղծագործությունները: Համերգից առաջ շնորհավորական խոսքով հանդես եկան Սան Պաուլո նահանգի մշակույթի քարտուղար Սելսո Բոսկոլոն, եռյակի ղեկավար Հենրիկե Միլլերը և Բրազիլիայում ՀՀ դեսպան Աշոտ Եղիազարյանը: Դեսպան Եղիազարյանը նշեց, որ քսանմեկ տարի առաջ Հայաստանի ժողովուրդն ընտրել է ազատ զարգացման, ժողովրդավարական բարեփոխումների և հարևան երկրների հետ խաղաղ գոյակցության ճանապարհը ու կշարունակի վստահորեն քայլել այդ ճանապարհով` անկախ օբյեկտիվ կամ արհեստականորեն հրահրվող դժվարությունների:
Սեպտեմբերի 30-ին Սան Պաուլոյի «Հայկական ակումբ» համալիրում տեղի է ունեցել Հայաստանի անկախության 21-րդ տարեդարձին նվիրված վերջին մեծ միջոցառումը: Միջոցառման ավելի քան 500 հյուրերի թվում էին հայկական համայնքի բոլոր միությունների և կազմակերպությունների ներկայացուցիչները, քաղաքային կառավարության անդամներ, նահանգապետ ժ. Ալկմինի անձնական ներկայացուցիչը, ինչպես նաև առաջիկա ընտրություններում Սան Պաուլոյի քւսղաքապետի թեկնածու Ս. Ռուսսոմանուն:
