ՅՈՒԿՕՍ նավթային ընկերության նախկին ղեկավար Միխայիլ Խոդորկովսկու շուրջ ծավալված իրավիճակը «քաղաքական ենթատեքստով հետապնդման վառ օրինակ է»: ITAR-TASS-ի փոխանցմամբ` այս մասին այսօր հայտարարել է Ռուսաստանի հարցով ԵԽԽՎ համազեկուցող, ռումինացի սենատոր Գեորգի Ֆուրունդան՝ Վեհաժողովի Ռուսաստանի հարցով զեկույցի քննարկումների բացմանը:
«Խոդորկովսկին քաղբանտարկյալի տիպիկ օրինակ է»,- ասել է Ֆուրունդան՝ հիշեցնելով, որ ավելի վաղ հանդիպել է նրա հետ բանտում:
«Իրավապաշտպանների, ընդդիմության անդամների հետապնդումները շատ դեպքերում ունեն քաղաքական ենթատեքստ,- ամփոփել է խորհրդարանականը:- Այդ ամենը լրջորեն վտանգում է ժողովրդավարական սկզբունքները»:
Ռուսաստանի հարցով մոնիթորինգային զեկույցի տեքստում ասվում է, որ «2010թ. դեկտեմբերին կայացված Խոդորկովսկու դատավճիռը, որը նախատեսում է դեռ 6 տարվա ազատազրկում, ընդունվել է գլխավորապես որպես նշան առ այն, որ Ռուսաստանի դատական իշխանությունները, նախկինի պես, գործադիր իշխանությունների կողմից ենթարկվում են քաղաքական ճնշման և ազդեցության»:
Զեկույցի քվեարկությունը տեղի կունենա այսօր:
