Հաշված ժամեր անց՝ ժ. 20.00-ին, Ստանիսլավսկու անվան ռուսական դրամատիկական թատրոնում կմեկնարկի «ՀայՖեստ» միջազգային թատերական 10-րդ փառատոնը:
Փառատոնը կբացվի ճապոնական հայտնի պարային խմբերից մեկի՝ «Դադադադան Տենկո»-ի պարային ներկայացմամբ, որի մեսիջը, ըստ նրանց, «երջանկության պատգամ» փոխանցելն է:
Փառատոնն այս տարի կրում է Never Miss կարգախոսը: «ՀայՖեստին» կմասնակցեն 25 թատերական ու պարային խմբեր` 18 երկրներից, այդ թվում` Ճապոնիայից, եվրոպական երկրներից, Իրանից, Վրաստանից, Իսրայելից, Ղազախստանից, ԱՄՆ-ից, Սինգապուրից: Հայաստանից փառատոնին կմասնակցեն «Միհր», Հովհաննես Թումանյանի անվան պետական տիկնիկային, Պատանի հանդիսատեսի թատրոնները:
Փառատոնի նախագահ Արթուր Ղուկասյանը տեղեկացրեց, որ այս տարի հայ հանդիսատեսը հնարավորություն ունի դիտելու այնպիսի հայտնի թատրոնների ներկայացումներ, ինչպիսիք են «Լո Գոլթուզ» թատրոնը` Ֆրանսիայից, Թումանիշվիլու անվան թատրոնը` Վրաստանից, «Դադադադան Տենկոն»` ճապոնիայից: Ընդ որում՝ փառատոնի արտասահմանյան ներկայացումների մուտքն անվճար է:
Փառատոնին աջակցում են ՀՀ մշակույթի նախարարությունը, Երևանի քաղաքապետարանը, Հայաստանի երիտասարդական հիմնադրամը:
