ԱԺ անկուսակցական պատգամավոր Էդմոն Մարուքյանը, այսօր ելույթ ունենալով ԱԺ ամբիոնից, նշել է, որ ինքն է որոշելու՝ ինչպես է մասնակցելու Վարդան Օսկանյանին իբրև մեղադրյալ ներգրավելու միջնորդագրի քվեարկությանը: Նրա խոսքով` ինքը որևէ խմբակցության անդամ չէ, և իր քվեարկության անմիջական պատասխանատուն ինքն է:
Էդմոն Մարուքյանը Վարդան Օսկանյանին է հիշեցրել 2003, 2005, 2007, 2008 թվականները. երբ ինքը մարդու իրավունքների պաշտպանությամբ էր զբաղվում, իրեն ասում էին` ընդդիմադիր ես, քանի որ այցելում ես ՔԿՀ` ընդդիմադիր ինչ-որ մեկին, իսկ այսօր պաշտպանության կարիք ունի Վարդան Օսկանյանը, և այստեղ այլ հարց է՝ ով, ինչպես և ինչ է անելու: Պատգամավորը բարձր է գնահատել այս օրերին ի պաշտպանություն Վարդան Օսկանյանի` քաղաքացիական հասարակության ցուցաբերած աջակցությունը, որը չի առաջնորդվում քաղաքական շարժառիթներով:
«Հիմա եկել է ժամանակը, որ պաշտպանենք Ձեզ, և երեկվա ցույցը ապացուցեց, որ քաղաքացիական հասարակությունը հանդես կգա Ձեր պաշտպանությամբ: Ես այլ կերպ չեմ կարող վարվել, ես իմ խոստումը չեմ դրժում, ես դեռ այն ժամանակ էի ասում, որ եթե պետք լինի, Ձեզ էլ եմ աջակցելու»,- ասել է Էդմոն Մարուքյանը:
Նա դիմել է Աղվան Հովսեփյանին` ասելով. օրինակ` եթե հայտարարվում է, որ Վարդան Օսկանյանը չի կալանավորվելու, նա ազատորեն տեղաշարժվելու է, հետաքրքիր է՝ մեղադրանք առաջադրելուց հետո ի՞նչ խափանման միջոց եք առաջարկում:
Խոսրով Հարությունյանն էլ թեև չէր որոշել խոսել, բայց Վարդան Օսկանյանի` երեկ ունեցած ելույթի երկրորդ հատվածից հետո որոշել էր խոսել: ՀՀԿ-ական պատգամավորի խոսքով` պարոն Օսկանյանը փորձում է ներկայանալ որպես տառապյալ, հալածյալ, նա փորձում է ձերբազատվել իր ոչ վաղ իշխանական անցյալից, բայց եթե որևէ մեկը ուզում է իր քաղաքական անցյալը շտկել, ապա դրա ճանապարհը մեկն է՝ խոստովանել այն սխալները, որոնք թույլ է տվել, և խոստովանել հրապարակավ, այլապես Խոսրով Հարությունյանին հասկանալի չէ այն մոլեռանդությունը, որը արտահայտում է ԲՀԿ-ն ՝ այս ամենը համարելով իր նկատմամբ քաղաքական հալածանք:
«500.000 ձայն ստացած կուսակցությանը ինչպե՞ս կարելի է հալածել»,- հարց է ուղղել Խոսրով Հարությունյանը:
Լուսանկարը՝ PanARMENIAN Photo-ի
