Ստեփանակերտի օդանավակայանն անցած տարի մայիսից արդեն լավատեսական հույսեր էր ներշնչում, որ շուտով թռիչքները կսկսվեն, բայց հետո ռելիեֆային խոշոր աշխատանքներ են կատարվել, լեռներ են տաշվել` թռիչքների անվտանգության համար, նորագույն տեխնիկա է մտցվել` թռիչք-վայրէջքների ապահովության համար: Այսօր լրագրողների հետ հանդիպմանը այս մասին հայտնեց Ստեփանակերտի օդանավակայանի գլխավոր ճարտարապետ Տիգրան Բարսեղյանը:
Նրա խոսքով` օդանավակայանի կառուցման համար շուրջ 5 մլն դոլար է ծախսվել: Այժմ այն բերվել է տեխնիկական ավարտուն տեսքի: Դրա թողունակությունը ժամում 100 ուղևոր է, ունի զարգացման լավ միտումներ:
«Ադրբեջանցիները տեսականորեն կարող են հարվածել և՛ ինքնաթիռը, և՛ ատոմակայանը, և՛ Պենտագոնը»,- ասաց Տ. Բարսեղյանը:
Քաղաքագետ Լևոն Շիրինյանի կարծիքով` հայերը երբեք չպետք է մոռանան մի բան՝ մեր դիմացինը թուրք է, որ սովոր է հայի հաշվին հարցեր լուծել:
Ըստ նրա՝ օդանավակայանի շահագործումը պետք է սկսել` հաշվի առնելով ընդհանուր քաղաքական իրավիճակը:
«Սա ներվերի պատերազմ է. այն կողմը, որը կկարողանա մյուսի ներվերը ջարդել, նա էլ կհաղթի: Քանի որ այս քայլը արել ենք, պետք է մինչև վերջ տանենք: Երբեք չպետք է տուրք տանք թուրքերի սպառնալիքներին: Պետք է կարողանալ ծայրահեղ լարել իրավիճակը, Արցախի բանակը պետք է մարտական իրավիճակի բերել, սպառնալիքներ են պետք, հակաօդային պաշտպանության մասին էլ խոսք չկա` այն պետք է կատարյալ լինի: Եթե սա չարվի, հակառակ դեպքում անիմաստ է»,- ասաց Շիրինյանը:
Նրա ենթադրությամբ՝ միջազգային ավիացիոն կազմակերպությունը թռիչքների իրականացման իր համաձայնությունը տվել է. «Կացնահարման դեպքից հետո կարծես ԱԳՆ-ն ակտիվ շարժի մեջ է, և իրադրությունը պետք է այնպես շրջել, որ թռիչքները սկսվեն»,- ասաց Շիրինյանը՝ առաջարկելով «Ղարաբաղ», «խաղաղասեր» տերմիններն այլևս չօգտագործել. «Պատրաստվեք պատերազմի: Նյարդերի պատերազմում տեղի տվողը հաջորդը ռազմադաշտում է զիջելու»:
Լուսանկարը՝ PanARMENIAN Photo-ի
