Թուրքական Enson Haber լրատվական կայքի փոխանցմամբ՝ Անկարայի 2-րդ դատարանն ուշագրավ պատասխան է տվել հիմնական ընդդիմադիր Ժողովրդա-հանրապետական կուսակցության (ԺՀԿ) առաջնորդ Քմալ Քըլըչդարօղլուին, որը դատական հայց էր ներկայացրել իրեն որպես հայ ներկայացրած թուրք գրող Սուլեյման Եշիլյուրթի նկատմամբ:
Եշիլյուրթը նախորդ տարվա հունիսին տեղի ունեցած խորհրդարանական ընտրություններից առաջ հրատարակել էր «Դերսիմցի հայ Եմուշ խանումի որդի ինժեներ Քեմալը» գիրքը, որը մեծ աղմուկ էր բարձրացրել Թուրքիայում: Գրքում հեղինակը պնդում էր, թե Քըլըչդարօղլուն ունի հայկական արմատներ՝ ընդգծելով, որ նրա մայրը Դերսիմի հայերից է (Քըլըչդարօղլուն ծնունդով Դերսիմից է՝ ներկայիս Թունջելիից):
Գրքի հրատարակումից հետո Քըլըչդարօղլուն դիմել էր դատարան՝ ընդգծելով, որ գրքում իրեն վիրավորել ու զրպարտել են: Նա վիրավորանք էր դիտել իրեն հայկական ծագում վերագրելը: Սակայն Անկարայի 2-րդ դատարանը մերժել է Քըլըչդարօղլուի ներկայացրած հայցը՝ նշելով, որ գրքի միջոցով քաղաքական վնաս չի պատճառվել նրան, և որ Թուրքիայում առկա է խոսքի ազատություն: Դատավճռում ասվում է, որ հայ լինելը չի կարող համարվել վիրավորանք:
