Լոռու մարզում առողջապահության համակարգում որակի և մատչելիության բարելավման ուղղությամբ մեծ չափերի բարեփոխումներ են իրականացվել պետական ծրագրերով և պետական ֆինանսավորմամբ: Ներդրվել են ծննդօգնության, երեխայի առողջության պետական հավաստագրերի, շտապբուժօգնության և համավճարային համակարգերը: Տարբեր համայնքներում`Վանաձոր, Ալավերդի, Արևաշող, Արևածագ, Ախթալա, Գեղասար, վերակառուցվել և վերանորոգվել են բուժական հաստատություններն ու կենտրոնները:
2012 թվականին առողջապահության համար պետպատվերով նախատեսված է եղել շուրջ 2 միլիարդ 893 միլիոն 596 հազար դրամ, 1 միլիարդ 938 միլիոն 113 հազար դրամի հատկացում է եղել կառավարության կողմից, վճարովի ծառայություններից ստացված գումարը կազմել է 313 միլիոն: Մարզի առողջապահության ոլորտում նախատեսվում է վերանորոգման և վերակառուցման մի շարք հրատապ աշխատանքներ իրականացնել նաև համայնքների զարգացման 4-րդ ծրագրով:
Նշված տվյալները ներկայացնելով`Լոռու մարզպետարանի առողջապահության վարչության պետ Սամվել Լամբարյանը, սակայն, նշեց, որ բազմաթիվ անելիքների ու խնդիրների լուծման համար հնարավորությունները չեն բավականացնում: «Մենք բոլորս էլ գիտենք, թե ինչ վիճակում է այսօր հանրապետության բյուջեն և առողջապահության բյուջեն նաև»,- ասաց վարչության պետը` նախապես ֆինանսական մեծ չափի հատկացումները թվարկելուց հետո:
Ինչպես Սամվել Լամբարյանը նշեց, ստեղծվել և արդեն գրանցման գործընթացի մեջ է «Լոռու առողջապահության հիմնադրամը»`մարզպետի գլխավորությամբ: Այն ֆինանսական կառույց է, որի հիմնական նպատակներից մեկը համայնքապետերին ներգրավելն է առողջապահության բնագավառի գործընթացների մեջ: «Այն խնդիրները, որոնք պետության կողմից հնարավորություն չի լինի աջակցել, հիմնադրամի կողմից կփորձենք աջակցություն իրականացնել: Վերջիվերջո, առողջապահության համակարգը ոչ թե առանձնացված կառույց է մարզպետարանում կամ ամբողջ հանրապետությունում, այլ ծառայություն է մատուցում համայնքապետերի կողմից սպասարկվող համայնքներում, նրանց կողմից ղեկավարվող ազգաբնակչության համար, նրանց ընտրողների համար»,- նշեց Սամվել Լամբարյանը:
