Թուրքիայում անցկացվում է իշխող «Արդարություն և զարգացում» կուսակցության համագումարը: Պատվիրակների առջև դրված է նոր ղեկավարության ընտրության և առաջիկա 10 տարում քաղաքական զարգացման նոր ուղղությունների սահմանման հանձնառություն: Այս մասին հաղորդում է Associated Press-ը:
Կուսակցության գործող առաջնորդ, վարչապետ Ռեջեփ Թայիփ Էրդողանի խոսքով` երկիրը բախվում է նոր մարտահրավերների, որոնց շարքում են քրդերի ակտիվացումը, հարևան Սիրիայից փախստականների զանգվածային հոսքը: Նա մտադիր է քննարկման ներկայացնել տնտեսական զարգացման նոր մոտեցումները:
Նշենք, որ Էրդողանի համար վարչապետի լիազորությունների ընթացիկ ժամկետը երրորդն է ու վերջինը: Քաղաքագետները կանխատեսում են, որ նա փորձում է փոփոխություններ կատարել օրենսդրությունում` Թուրքիան խորհրդարանական հանրապետությունից վերածելով նախագահականի: Այդպիսով Էրդողանը իրավունք կստանա կրկին զբաղեցնել հանրապետության բարձրագույն պաշտոնը:
