ԱՄՆ-ի զինվորականները Գուանտանամոյի բանտից արտաքսել են ամենաերիտասարդ բանտարկյալին՝ կանադացի Օմար Հադրին, ով այնտեղ էր հայտնվել 15 տարեկանում, տեղեկացնում է կանադական CBC գործակալությունը:
Հադրը ձերբակալվել էր Աֆղանստանում հատուկջոկատայինների կողմից և Գուանտանամոյում էր գտնվում 2002 թվականի հոկտեմբերից ԱՄՆ-ի զինվորականների դեմ ականներ օգտագործելու կասկածանքով: Միայն 2010 թվականի դեկտեմբեր ամսին նա ընդունեց, որ մեղավոր է ԱՄՆ-ի սերժանտի սպանության մեջ:
Դատախազների և պաշտպանների պայմանավորվածության համաձայն՝ Հադրը մեղքն ընդունելու դիմաց իր պատիժը պետք է կրեր ութ տարի ազատազրկմամբ: Հայրենիք վերադառնալուց հետո միայն Հադրը իրավունք ունի պայմանական ազատարձակման դիմում ներկայացնելու:
Շաբաթ օրը Հադրը ժամանել է Կանադա, որտեղ նրան տեղավորել են Օնտարիոյի շրջանում գտնվող Mill Heaven բանտում:
Հադրը վերջին արևմտյան քաղաքացին է, ով իր պատիժը կրում էր Գուանտանամոյի բանտում:
Օմար Հադրը ծնվել է Տորոնտոյում, սակայն նրա մանկությունն անցել է Պակիստանում և Աֆղանստանում: Հադրի ձերբակալությունից մեկ տարի անց, նրա հայրը, ով «Ալ-Քաիդա» ահաբեկչական խմբավորման տնտեսագետ էր համարվում, սպանվեց Պակիստանում հակաահաբեկչական գործողությունների իրականացման ժամանակ:
2008 թվականին Օբաման, ով դեռ նախագահի թեկնածու էր, խոստացավ փակել Գուանտանամոյի բանտը: 2009թվականի հունվարին նա կարգադրեց դադարեցնել Գուանտանամայում զինվորական դատախազության գործունեությունը: 2011 թվականի մարտ ամսին ահաբեկչության մեջ կասկածյալների դեմ զինվորական դատերն այնտեղ վերսկսվեցին:
Բացի դրանից՝ ԱՄՆ-ի նախագահը նոր հրամանագիր ստորագրեց, համաձայն որի՝ առանց մեղադրանք առաջադրելու, բանտարկյալներին հնարավոր է բանտում պահել այն դեպքում, եթե գործի քննությունը ցույց կտա, որ նա ԱՄՆ-ի անվտանգության համար լուրջ սպառնալիք է ներկայացնում:
