Սիրիական զորքերը և անվտանգության ծառայությունները ուրբաթ ետ են մղել այսպես կոչված՝ Սիրիական ազատ բանակի գրոհայինների վճռական հարձակումը, որը նրանք ձեռնարկել են երեկ երեկոյան Հալեպի տարբեր թաղամասերում:
Հարձակման նպատակը, ինչպես հայտնել է դաշտային հրամանատարներից մեկը, քաղաքին տիրելն էր:
«Այսօր երեկոյան մենք կգրավենք քաղաքը կամ կմեռնենք»,- հայտարարել է նա:
«Զինված բախումները Հալեպի տարբեր թաղամասերում սկսվել են հինգշաբթի երեկոյան, շարունակվել են ամբողջ երեկո և ուրբաթ առավոտյան: Օրվա կեսին կրակոցների հաճախականությունը զգալիորեն նվազել է»,- հաղորդել է տեղի բնակիչներից մեկը:
Ըստ ականատեսների վկայությունների՝ ՍԱԲ-ի գրոհայինները ցանկացել են ներխուժել քաղաքի կենտրոն, որտեղ տեղակայված է պետական հաստատությունների մեծ մասը, սակայն դա նրանց չի հաջողվել` սիրիական զորքերը ետ են մղել հարձակումը: Գրոհայինները, կորուստներ կրելով, նահանջել են:
Ամենակատաղի մարտերը ընթացել են Հալեպի հյուսիսում տեղակայված քրդական Շեյխ Մաքսուդ թաղամասում: Այնտեղ ներխուժած գրոհայինները սկզբում զինված դիմադրության են հանդիպել բնակիչների կողմից, այնուհետև նրանց օգնելու համար վրա է հասել սիրական զորքը:
«Սուրիյա Ալ-Ան» տեղեկատվական գործակալության տվյալներով` զոհվել են 16 գրոհայիններ: Ներկա դրությամբ սիրիական զորքը ամբողջովին ղեկավարում է քրդական թաղամասը:
Կառավարական ուժերի և գրոհայինների բախումները ընթացել են նաև Նեյրիբի օդանավակայանի մոտակայքում:
Արդյունքում չորս մարդ զոհվել է, և 10-ը վիրավոր է:
