«Ես գեյ եմ և մուսուլման» ֆիլմը, որի ցուցադրությունը նախատեսված է այսօր Բիշքեկում` մարդու իրավունքների փառատոնի՝ «Բիր դույնոյի» շրջանակներում, որակվել է ծայրահեղական:
Այսպիսի որոշում է կայացրել Բիշքեկի Պերվոմայսկի շրջանային դատարանը: Ազգային անվտանգության գլխավոր վարչության նախագահին էր դիմել Ղրղըզստանի մուսուլմանների մուֆտի Ռախմատուլլա Աժա Էգեմբեևրդիևը՝ խնդրելով թույլ չտալ ֆիլմի հեռարձակումը:
Մուֆտիի կարծիքով՝ ֆիլմը «իսլամն ի ցույց է դնում ոչ հարիր տեսքով` այն մարդկանց օրինակով, որոնք ոչ մի ընդհանրություն չունեն իսլամի հետ»,- հաղորդում է АКИpress-ը:
Ազգային անվտանգության գլխավոր վարչությունում ֆիլմին փորձագիտական գնահատական էին տվել Կրոնի հարցերով պետական հանձնաժողովի մասնագետները:
Ըստ այդմ՝ «Ես գեյ եմ և մուսուլման» ֆիլմն իր մեջ պարունակում է կրոնական թշնամանքի առաջացման, մուսուլմաններին ստորացնող տարրեր:
Դրա հետ կապված` երկրի գլխավոր դատախազությունը դատարան է դիմել հայցով, ինչի հիման վրա դատարանը բավարարել է հայցը և արգելել ֆիլմի ցուցադրությունն ու տարածումը Ղրղըզստանի տարածքում:
59 րոպե տևողությամբ ֆիլմը նկարահանվել է ռեժիսոր Քրիս Բելլոնիի կողմից` 2012թ.:
