Խորհրդային գրոսմայստեր, լեգենդար շախմատիստ Բորիս Սպասկու որդին անձը չպարզված մարդկանց դեմ հայց է ներկայացրել ֆրանսիական դատարան՝ կապված հոր առևանգման ու հնարավոր ազատազրկման հետ, հաղորդում է ֆրանսիական Figaro թերթը:
Այս տարվա օգոստոսին ռուսական ԶԼՄ-ներում տեղեկություն հայտնվեց այն մասին, որ Բորիս Սպասկին հոսպիտալացվել է մոսկովյան կլինիկաներից մեկում:
Ավելի վաղ, 2010թ. հայտնի գրոսմայստերը կաթված էր ստացել: Նա հոսպիտալացվել էր մոսկովյան հիվանդանոցներից մեկում, սակայն ավելի ուշ նրա ընտանիքը շախմատիստին տեղափոխեց Ֆրանսիա:
Ռուսական հրատարակություններից մեկին տված հարցազրույցում, որի իսկությունը վիճարկում է Սպասկի-Կրտսերը, գրոսմայստերը պատմել է, որ Ֆրանսիայում գտնվել է բառացիորեն «ազատազրկման մեջ», ու չի ունեցել ոստիկանություն դիմելու հնարավորություն, որ բարեկամներն իբր իրեն տվել են մեծ քանակությամբ հոգեմետ դեղամիջոցներ, որոնք հարուցել են մաշկային տարբեր հիվանդություններ:
Նա նաև հայտարարել էր, որ զրկված է եղել նաև ռուսական ու ֆրանսիական փաստաթղթերից, սակայն իր ընկերների օգնությամբ կարողացել է այս տարվա օգոստոսին վերադառնալ հայրենիք:
Figaro-ի հետ հարցազրույցում գրոսմայստերի որդին ներկայացրել է բոլորովին այլ պատմություն: Հայրը հիվանդանոցից տուն վերադառնալիս անհետացել է իսպառ ու 3 շաբաթ անց ինքը տեղեկացել է, որ հայրը գտնվում է Մոսկվայի հիվանդանոցներից մեկում:
Բորիս Սպասկին ծնվել է Լենինգրադում 1937թ. հունվարի 7-ին, շախմատ է սկսել խաղալ 5 տարեկանից Ուրալում:
1955թ. աշխարհի չեմպիոն է դարձել պատանիների շրջանում, 1961 ու 1973թթ. դարձել է ԽՍՀՄ չեմպիոն, իսկ 1969թ. Սպասկին նվաճեց աշխարհի չեմպիոնի տիտղոսը՝ հաղթելով հայ գրոսմայստեր Տիգրան Պետրոսյանին:
