Ադրբեջանական Turan լրատվական գործակալության փոխանցմամբ՝ Ադրբեջանում երեկ քաղաքական ռումբ է պայթել, երբ ինտերնետում հայտնվել է մի տեսանյութ, որում Միջազգային համալսարանի նախկին ռեկտոր Էլշադ Աբդուլաևը սակարկում է մի կնոջ հետ, ով նման է իշխող «Ենի Ազերբայջան» կուսակցության (ԵԱԿ) պատգամավոր Գյուլյար Ահմեդովային:
Խոսքը դրամական կաշառքի մասին է, որը ռեկտորը պետք է վճարի պատգամավոր ընտրվելու համար: Տեսանյութում երևում է, որ այդ հանդիպմանը ներկա է նաև Սևա անունով մի կին, ով բանակցությունների ժամանակ կատարում էր միջնորդի դեր՝ պայմանավորվելով գնի շուրջ: Էլշադ Աբդուլաևը համաձայնում է վճարել 500.000 (չի նշվում մանաթ, թե դոլար), սակայն նրան հայտնում են, որ նա այդքան էլ դեռ պետք է վճարի:
Ռեկտորը, սակայն, առարկում է՝ պնդելով, որ իրենք պայմանավորվել են 500.000-ի շուրջ, որ ինքն արդեն իսկ վճարել է այդ գումարը: Նա հավելում է, որ պատրաստ է վճարել ևս 500.000, եթե իրեն ընտրեն խորհրդարանական հանձնաժողովի նախագահ: Սակայն կինը նրան պատասխանում է, որ այդ պաշտոնը զբաղեցնում է Ալի Հուսեյնովը, և ոչ ոք չի փոխի նրան:
Ահմեդովան իր զարմանքն է արտահայտել, որ ռեկտորը դեռ սակարկում է իր հետ, և դա այն դեպքում, երբ ինքը համարձակվել է փոխել Իլհամ Ալիևի կազմած ցանկը և ռեկտորին խցկել դրանում:
Գյուլյար Ահմեդովայի ներկայացուցիչները մեկնաբանել են այդ տեսանյութը՝ հայտարարելով, որ այդ խոսակցությունը տեղի է ունեցել 2005 թվականին, սակայն այնտեղ խոսքը Միջազգային համալսարանի խաբված ուսանողների փողերի մասին է, և Ահմեդովան պահանջել է վերադարձնել դրանք:
