«Մեր դպրոցները ապակուսակցական են: Եթե տնօրենները կուսակցական են, ապա նրանք կուսակցական են որպես ՀՀ քաղաքացիներ»,- այսօր ԱԺ-ում 2011 թ. բյուջեի կատարողականի քննարկումների ժամանակ հայտարարեց ԿԳ նախարար Արմեն Աշոտյանը՝ պատասխանելով ՀԱԿ պատգամավոր Արամ Մանուկյանի դիտարկմանը, թե` ՀՀ դպրոցների 1150 տնօրեններ ՀՀԿ-ական են:
Ըստ նախարարի՝ որևէ օրենք դասախոսներին, ուսանողներին կամ տնօրեններին չի արգելում լինել որևէ կուսակցության անդամ. «Նման խոսակցությունները դիտում եմ որպես ոչ ազատական հայտարարություն: Բայց Ձեր հայտարարած թվերը ավելի լավատեսական են, քան մեր ունեցած տվյալները: Եթե ձեր աղբյուրը հայտնեք, շնորհակալ կլինեմ»:
Ա. Աշոտյանի խոսքով` ՀՀԿ-ական լինելը դպրոցների տնօրեններին ավելի է պարտավորեցնում լավ աշխատել: Ընդ որում, նա նշեց, որ մասնագիտական քննություններից կտրված տնօրենների կեսը ՀՀԿ-ական են: Աշոտյանը խոստացավ, որ կուսակցականությունը դպրոց չի մտնի:
Քննարկման ժամանակ անդրադարձ եղավ դասագրքերի լեզվին, որը պատգամավոր Խոսրով Հարությունյանի խոսքով` «շատ բարդ է»: Աշոտյանը համաձայնեց, որ ոչ բոլոր դասագրքերը պետք է գրվեն ՀՀ-ում, և պետք է ներդնել միջազգային լավ փորձը:
Անդրադառնալով ջավախքահայության կրթական խնդիրներին՝ Աշոտյանը հայտարարեց, որ Հայաստանը ջավախքահայությանը պետք է օգնի կրթության որակի առումով, իսկ Վրաստանի կառավարությունը դպրոցաշինության հարցում ծրագրեր իրականացնում է:
Ի դեպ, նախարարը նաև հայտնեց` եթե պետությունը ուսանողի համար ծախսում է 4 հազար դոլար, ապա գյուղ չվերադառնալու և այնտեղ չաշխատելու դեպքում քաղաքացին պետք է վերադարձնի կրկնակի՝ 8 հազար դոլար գումար:
