Եթե սփյուռքը հասկանա, որ ՀՀ սփյուռքի նախարարությունը ստեղծվել է նրանցից ֆինանսական ակնկալիքներ ունենալու համար, նրանք չեն համագործակցի նախարարության հետ. նման տեսակետ այսօր Աժ-ում 2011 թ. բյուջեի քննարկման ժամանակ հայտնեց սփյուռքի նախարար Հրանուշ Հակոբյանը՝ նշելով, որ սա պետական քաղաքականության հարց է. «Կան տնտեսական ծրագրեր, կա Համահայկական հիմնադրամը, թող այդ ճանպարհով այդ խնդիրները լուծվեն»:
Հ. Հակոբյանի խոսքերով, արդեն ժամանակն է որևէ փաստաթղթով ձևակերպելու սփյուռքի իրավունքներն ու պարտականությունները: Նրա բնորոշմամբ՝ սփյուռքը դարձել է միջպետական, ներպետական, վերպետական հարաբերությունների սուբյեկտ, և դրանով պետք է միջպետական կառույցները զբաղվեն:
Նախարարը նշեց, որ 55 մլն-ով Ցեղասպանության 100-րդ տարելիցի միջոցառման շրջանակներում Վիլսոնի գիրքն է հրապարակվել, համաժողով է գումարվել: 22 մլն դրամով նախարարությունը գնել է ավտոբուս «Արի տուն» ծրագրի երեխաների համար:
«Ձեր գործունեության արդյունքում որքա՞ն մարդ է որոշել վերադառնալ հայրենիք»,- հարցրեց ՀՅԴ խմբակցության պատգամավոր Արծվիկ Մինասյանը:
Հ. Հակոբյանը պատասխանեց, թե հստակ թիվ չի կարող ասել, բայց 600-ից ավելի ընտանիքներ եկել, հաստատվել են Հայաստանում, առնվազն կիսով չափ ավելացել է տուրիզմը, երկկաքաղաքացիների ավելացումը նույնպես արդյունք է վստահության ավելացման: