Այսօր «2011թ. պետական բյուջեի կատարման մասին» տարեկան հաշվետվության կապակցությամբ հրավիրված Ազգային ժողովի տարածքային կառավարման և տեղական ինքնակառավարման հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստը բավականին բուռն ընթացավ:
Մարզպետներին վրդովեցնում էին ՀԱԿ պատգամավոր Նիկոլ Փաշինյանի հարցադրումները, ում չէին գոհացնում մարզպետների խորհրդային կոմունիստների ոճով արված հայտարարությունները «փայլուն» կատարողականների վերաբերյալ, և նա առավել մանրամասն, կոնկրետ օրինակների մասին էր հարցնում:
ՀՀ տարածքային կառավարման փոխնախարար Վաչե Տերտերյանը «Առաջին լրատվական»-ի հետ զրույցում չհամաձայնեց, որ մարզպետները սկզբում վրդովվել էին պատգամավորի հարցադրումներից. «Ես չեմ կածում, որ վրդովվեցին, միգուցե նման տպավորություն կար: Ավելի շուտ, ըստ երևույթին, հաշվետվության բովանդակության իրենց պատկերացրածի և հարցադրումների տարբերություն կար: Սա, փաստորեն, ԱԺ կողմից արդեն հաստատված բյուջեի կատարվող ծախսերի հաշվետվություն էր:
Շատ հարցերի հիմքում կարծես հնչում էր պահանջ կամ խնդրանք, առաջարկություն ծրագրերի նպատակայնության մասին, ինչը մի քիչ այլ թեմա է, և բյուջեն հաստատելուց պետք է խոսվեր:
Անսպասելիություն կար, վերջում արդեն տրամաբանությամբ գնում էր: Հետո հարց տալու և հարցին պատասխանելու տարբերություն կա: Եթե հարց եք տալիս, կարող եք ամեն հարց տալ՝ ձեր կարծիքով, ստատիստիկ այս ցուցանիշները կարևոր են, բայց նման կարևոր ցուցանիշները հարյուրավոր են, և մարզպետները չեն կարող բոլորը սերտած իմանալ: Այլ բան է, որ դրանց մասին, որպես երևույթ, պետք է տիրապետեն, և վստահ եմ, որ բոլորը տիրապետում են դպրոցների առաջին դասարանցիների քանակի վերաբերյալ տվյալներին: Սա համենայնդեպս ազդակ էր՝ հետագայում քննարկումներն այլ հարթության վրա տեղափոխելու»:
