Հեռուստամեկնաբան Պետրոս Ղազարյանը Ej էլեկտրոնային պարբերականի (ejournal.am) իր բլոգում գրել է.
Ատկատների մասին վերջին խորհրդակցությունից հետո, մեր քաղաքական մշակույթում տրագիկոմեդիայի ժանրը հասավ իր գագաթնակետին: Շարժվելով ժանրի կանոններով, ներկայացնեմ երևակայական մի հարցազրույց՝ «ատկատի դեմ պայքարի» ժանրից:
Լրագրող– Պրն վարչապետ, ինչպե՞ս է ընթանում ատկատների դեմ պայքարը:
Վարչապետ– Գիտեք, մենք մշակել ենք ատկատների դեմ պայքարի ռազմավարական ծրագիր, համաձայն որի Թաիրով գյուղը պետք է դարձնենք ատկատների դեմ պայքարի տարածաշրջանային կենտրոն: Այս առումով ռազմավարական ծրագիրն արդեն մշակված է: Շուտով պատրաստ կլինեն նաև ռազմավարական ծրագրի հայեցակարգային դրույթները, որոնք հանրության ը կներկայացվեն ստրատեգիական առաջնահերթությունների հետ համադրելուց հետո: Այնպես որ, մենք աշխատում ենք:
Լրագրող– Իսկ ինչպե՞ս եք Թաիրովը դարձնելու ատկատի դեմ պայքարի տարածաշրջանային կենտրոն:
Վարչապետ– Գիտեք, մենք համաշխարհային բանկի հետ պայմանավորվել ենք մոտ 10 միլիոն դոլարի ներդրում կատարել: Եվ միանգամից ասեմ, որ այս տենդերը շահել է իմ բարեկամը, որպեսզի ոչ մի չարանենգ օլիգարխ չփորձի միջոցները յուրացնել: Այնպես որ, ներդրումները գտնվում են հուսալի ձեռքերում: Աշխատանքները կատարվում են:
Լրագրող– Կոնկրետ ի՞նչ աշխատանքներ:
Վարչապետ– Գիտեք, օրինակ Թաիրովում կառուցվելու է մեծ ձկնաբուծարան: Եվ այդ օրվանից իրավապահ մարմինները, կառավարության անդամները և ես պետք է սովորենք ձուկը գլխից բռնել: Մինչև հիմա մենք պոչից էինք փորձում և ձկները պլստում էին: Իսկ ատկատների դեմ մենք իրականում վաղուց էինք պայքարում: Հիշում եք, ես ոչ վաղ անցյալում բացատրեցի, թե կովերին ինչպե՞ս պետք է կթել, այն ժամանակ ոչ ոք չհասկացավ, թե դա ինչ ենթատեքստում էր:
Լրագրող-Իսկ ինչպե՞ս է ընթանում պայքարը չարանենգ օլիգարխների դեմ:
Վարչապետ-Գիտեք, այսօր չեմ հիշում: Բացեք «Իրատես դե Ֆակտոն», հայտնի ինտելեկտուալ Կարմեն Դավթյանը պիտի որ գրած լինի:
