«Երևանյան հեռանկարներ» 13-րդ միջազգային փառատոնի շրջանակում Երևանում է հայտնի դաշնակահար Եվգենի Կիսինը, որը փառատոնի շրջանակում սեպտեմբերի 27-ին համերգային ծրագրով հանդես կգա Արամ Խաչատրյան համերգասրահոմ` ներկայացնելով Հայդն, Բեթհովեն, Շուբերտ և Լիստ:
«Մեկ բառով ասեմ. ես անց վարանելու ասում եմ՝ հանճարեղ երաժիշտ է, հանճար։ Ցանկացած դիրիժորի համար մեծ բախտավորություն է նրա հետ նվագելը։ Ութ տարի աշխատել ենք այս նախագծի վրա, և դարի ամենամեծ արվեստագետին կարողացել ենք բերել Հայաստան։ Սա մեր երկրի համար մեծ ձեռքբերում է,- ներկայացնելով դաշնակահար Եվգենի Կիսինին` լրագրողների հետ հանդիպմանն ասաց «Երևանյան հեռանկարներ» 13-րդ միջազգային փառատոնի հիմադիր նախագահ Ստեփան Ռոստոմյանը՝ ավելացնելով,- երկրաշարժից հետո շատ է օգնել մեր երկրին»։
«Սա Հայաստանի մշակութային կյանքի համար բարձրագույն գագաթն է»,- անկեղծացավ Ստեփան Ռոստոմյանը։
«Անկեղծ ուրախ եմ՝ 28 տարվա մեջ առաջին անգամ լինելով այստեղ։ Երևանյան փառատոն արտահայտությունը հնչում է հուսալի ու վստահելի։ Կան պետություններ, որտեղ չեմ գնում որոշ նկատառումներից ելնելով»,- ասաց դաշնակահարը։ Նա խոստովանեց, որ չի գնում Թուրքիա, թեկուզ ունեցել է հրավերներ, հենց այն բանի պատճառով, որ նրանք չեն ճանաչել Հայոց ցեղասպանությունը, չի գնում Չինաստան, քանի որ, ինչպես կատակով ասաց, մեծացել է հենց այդ կարմիր դրոշների շրջապատում:
Եվգենի Կիսինը ծնվել է 1971 թ. Ռուսաստանում, հրեաների ընտանիքում։ 17 տարեկանում նվագել է Հերբերտ Ֆոն Կարայանի և Բեռլինի ֆիլհարմոնիկ
նվագախմբի, նաև Վալերի Գերգիևի և Լոնդոնի սիմֆոնիկ նվագախմբի հետ։
Կիսինը ստացել է երկու «Գրեմի» մրցանակ 2000 և 2010 թթ.։ Նա արժանացել է երաժշտական ասպարեզի գրեթե բոլոր մրցանակներին և պարգևներին. Կարայանի մրցանակի դափնեկիր է, Շոստակովիչի և Միկելանելիի մրցանակների դափնեկիր, Լոնդոնի թագավորական երաժշտական ակադեմիայի պատվավոր անդամ է։ Նա նաև Սպիտակի պատվավոր քաղաքացի է:
