Սակայն ժամանակավորապես` մինչև նոր թույլտվություն:
Մայրաքաղաքի Նալբանդյան 106-1 հասցեում 60-70 տարեկան տասնյակից ավելի ծառեր հատած «Ավագշին» ՍՊԸ-ն դադարեցրել է տարածքում տարվող աշխատանքները:
Տարածքում ծառահատումները կանխելու նպատակով «Մենք ենք այս քաղաքի տերը» նախաձեռնող խմբի և տարածքի հարևան շենքերի բնակիչների անցկացված բողոքի ակցիան գուցե տվեց իր արդյունքը, սակայն սա միայն ժամանակավորապես:
Նալբանդյան փողոցի նախկին մանկապարտեզի տարածքում մնացած տասնյակ ծառերն այժմ փրկված են ու պատված սպիտակ սավաններով:
Իսկ տարածքը փակվել եւ աշխատանքը տեղում ժամանակավորապես դադարեցվել է, քանի որ շինարարություն իրականացնող «Ավագշին» ՍՊԸ–ն չի ունեցել շինարարություն իրականացնելու թույլտվություն։
«ՍՊԸ–ն ունեցել է միայն քանդելու իրավունք, և քանի դեռ չստանա կառուցելու իրավունք, շինարարությունը չի վերսկսվելու»,- բողոքի ակցիայի մասնակիցներին այս մասին հայտնել է տարածքում գտնվող պաշտոնյաներից մեկը։
Հիշեցնենք, որ ըստ որոշ տեղեկությունների նշված տարածքում պատրաստվում են բարձրահարկ շենք կառուցել, ինչին էլ հատկապես ընդդիմացել են տեղի բնակիչները:
