«Առավոտ»-ը ներկայացնում է ՏԻՄ ընտրությունների արդյունքները և նշում, որ Արագածոտնի, Գեղարքունիքի, Կոտայքի, Վայոց Ձորի և Տավուշի մարզերի 318 համայնքներում իշխող Հանրապետական կուսակցության թեկնածուները հասել են մեծ առավելության: Համայնքների ղեկավարների ընտրություններ անցկացրած 262 համայնքներից միայն երկու տասնյակում են հաղթել ՀՀԿ-ի հիմնական մրցակցի` «Բարգավաճ Հայաստան» կուսակցության թեկնածուները, այն էլ` հիմնականում գյուղական այն համայնքներում, որտեղ ԲՀԿ-ն հանրապետական մրցակիցներ չուներ:
Aravot.am-ի հետ զրույցում ԲՀԿ մամուլի խոսնակ Տիգրան Ուրիխանյանը դիտարկմանը, որ, փաստորեն, հիմնական մրցակիցները դարձյալ ՀՀԿ-ն և ԲՀԿ- ն են, ու ընդհանուր հաշվով` ՀՀԿ-ն դարձյալ առաջատար դիրքերում է, հակադարձեց. «Տեղական ինքնակառավարման մարմինների ընտրությունները ոչ պետական, ոչ քաղաքական, այլ տեղական վարչարարություն իրականացնող անհատների ընտրություններ են: Ես շատ կցանկանամ, որ հասարակությունը, ընտրողներն իրենք դիտարկեն այդ ընտրությունները որպես սեփական կյանքի բարելավմանը, դրական փոփոխություններին միտված ընտրություններ, որոնք մեծ շղթայի մի օղակն են»: