ԱՄՆ նախկին նախահագ Բիլլ Քլինթոնը վստահ է, որ իր տիկինը` Հիլլարին, ունի բոլոր համապատասխան բնութագրերը պետության ղեկավարի պարտականությունները կատարելու համար: Սակայն նա չի համարձկավում ասել` արդյոք իր կինը ցանկություն կհայտնի այդ պաշտոնը նվաճելու համար 2016 թ. պայքարի մեջ մտնել:
«Ես նվազագույն պատկերացում անգամ չունեմ, թե նա ինչ կորոշի անել հետագայում»,- այսօր հայտարարել է Քլինթոնը BBC հեռուստաընկերությանը տված հարցազրույցում:
Հիլլարի Քլինթոնը, ով շուտով կդառնա 65 տարեկան, արդեն հայտարարել է ԱՄՆ պետքարտուղարի պաշտոնը լքելու իր մտադրության մասին, անկախ այն հանգամանքից, թե ով կհաղթի նոյեմբերին կայանալիք նախագահական ընտրություններում:
Բիլլ Քլինթոնը հաստատել է, որ իր կինը մտադիր է լքել պետքարտուղարի պաշտոնը, որի պաշտոնավարման ընթացքում` այսինքն 4 տարիների ընթացքում, նա հասցրել է հոգնել: Ըստ նրա՝ Հիլլարին մտադիր է հանգստանալ, գուց և սկսի գիրք գրել: «Անհրաժեշտ է նրան հնարավորություն տալ հանգիստ քննարկելու և խորհելու, թե ինչ է ցանկանում անել հետագայում»,- նշել է ԱՄՆ 42-րդ նախագահը` ավելացնելով, որ ցանկացած դեպքում պաշտպանելու է կնոջ որոշումը:
Կապված դիվանագիտական ծառայությունից Հիլլարիի դուրս գալու հետ` ԱՄՆ-ում քննարկվում են հնարավոր թեկնածուների անունները Բարաք Օբամայի հաղթանակի դեպքում: Նշվածների մեջ է նաև Սենատի արտաքին հարաբերությունների հանձնախմբի ղեկավար Ջոն Քերրին:
