Նորվեգիայի Գիտությունների և տեխնոլոգիաների համալսարանի համակարգչային և տեղեկատվական տեխնոլոգիաների ֆակուլտետի ուսանողների խումբը մշակել է հագուստի նախատիպ, որը թույլ է տալիս շփվել Facebook սոցցանցի միջոցով: Այս մասին հաղորդում է Newsru.com-ը:
Մշակումը կատարվել է արտակարգ իրավիճակներում աշխատանքի համար տեխնոլոգիաների և կապի միջոցների ստեղծման ԵՄ նախագծի շրջանակում:
Փրկարարական աշխատանքներն իրականացվում են մեծ խմբերով, դրանցում մասնակցում են տարբեր կազմակերպությունների և ստորաբաժանումների մասնագետներ: Օպերացիայի ընթացքում նրանք պետք է մշտապես շփման մեջ լինեն և համակարգեն իրենց գործողությունները: Նման իրավիճակում բջջայինի գործածությունն անարդյունավետ է:
Facebook մուտք գործելու համար նախատեսված սարքը կարված է բաճկոնի թևի մեջ և BlueTooth-ի միջոցով փոխգործակցության մեջ է Android համակարգով հեռախոսի հետ: Սարքն աշխատում է Arduino համակարգով: Օձիքում տեղադրված վիբրատորը կազդարարի հաղորդագրության ստացման մասին: Պետք է միայն ձեռքը վեր բարձրացնել և կարդալ այն: Փոխանցվող հաղորդագրությունը հնարավոր է նաև թելադրել, իսկ ստացողը կլսի այն:
Սոցիալական մեդիայի միջոցով մասնագետները մտադիր են բարձրացնել շփման հնարավորություններն ու փրկարարների աշխատանքի արդյունավետությունը: