«Կառուցապատողներին ծանուցվել է, որ 1 ամսվա ընթացքում քաղաքապետարանին հստակ ժամանակացույց ներկայացնեն իրենց ծրագրերի վերաբերյալ՝ երբ են սկսում, ինչ ժամկետներում, ինչ նախագծերով և ինչ տևողությամբ: Եթե ոչ՝ քաղաքապետարանն արդեն պարտադրված կլինի դիմել կառավարություն, որ տարածքները ճանաչվեն հանրային գերակա շահ»,- «Առաջին լրատվական»-ի հետ զրույցում ասաց Երևանի գլխավոր ճարտարապետ Նարեկ Սարգսյանը:
Հիշեցնենք, որ անցած շաբաթ Նարեկ Սարգսյանը հայտարարեց, թե Երևանում գտնվող կիսակառույցների սեփականատերերը «պարտավոր են առաջիկա մեկ ամսվա ընթացքում Երևանի քաղաքապետարան ներկայացնել շինարարական կառուցապատման ներդրումային ծրագրերը և ժամկետների ու շինարարության ավարտի վերաբերյալ նոր պայմանագրեր կնքել»: Հակառակ դեպքում, քաղաքապետարանը կդիմի կառավարությանը այդ շինությունները հանրային գերակա շահ ճանաչելու համար:
Նարեկ Սարգսյանը նաև ներկայացրել էր այն կիսակառույցների ցանկը, որոնք պետք է ենթարկվեն այդ պահանջին: Այդ ցանկի մեջ կան թե՛ նախկինում գոյություն ունեցող շենքեր, որոնք մասամբ քանդվել են և պետք է վերականգնվեն, թե՛ հիմքից կառուցվող շենքեր: Այդ ցանկում են կիսաքանդված «Դվին» հյուրանոցը, նախկին Երիտասարդության պալատի տարածքը, Սասունցի Դավիթ կայարանի հարակից տարածքի կիսակառույցը և այլն: Ի դեպ, այդ բոլոր կառույցները պատկանում են խոշոր գործարարներին և պաշտոնյաներին: Օրինակ` Երիտասարդության պալատը գնել էր, քանդել և տեղը ցանկանում էր հյուրանոց կառուցել «Ավանգարդ մոթորս» ընկերությունը: Կամ՝ «Մուլտի գրուպ կոնցեռն» ՍՊԸ-ն, որը Աբովյան 5/5 հասցեում ցանկապատել է 1857 քմ տարածք և չի իրականացնում նախաձեռնած շինարարությունը, պատկանում է ԲՀԿ ղեկավար Գագիկ Ծառուկյանին:
Արդյո՞ք քաղաքապետարանը կարող է ստիպել Ծառուկյանին կամ մյուս սեփականատերերին վերսկսել իրենց շինարարական աշխատանքները սահմանված ժամկետում: Հակառակ դեպքում, քաղաքապետարանն իսկապե՞ս կդիմի կառավարությանը այդ տարածքները հանրային գերակա շահ ճանաչելու համար: Նարեկ Սարգսյանը կրկին հաստատեց իր հայտարարությունները և ավելացրեց. «Դա նշանակում է, որ կլինեն նոր մրցույթներ, նրանք կփոխհատուցվեն իրենց ծախսերի հետ կապված: Կգան նոր կառուցապատողներ, ովքեր կշարունակեն աշխատանքները»:
