Հայաստանն ու Ղրղըզստանը չպետք է համեմատել միմյանց հետ: «Առաջին լրատվական»-ի հետ զրույցում նման կոչ արեց Ռուսաստանի Քաղաքական կոնյունկտուրայի կենտրոնի գլխավոր տնօրեն Սերգեյ Միխեևը՝ անդրադառնալով Ռուսաստանի կողմից Ղրղըզստանի կես միլիարդ դոլար պարտքը ներելու վերաբերյալ հարցին: Հիշեցնենք, որ պարտքի ներմանը զուգահեռ՝ կողմերը երկարաձգել են նաև Ղրղըզստանում ռուսական ռազմաբազաների տեղակայման ժամկետները:
Ըստ Միխեևի՝ պարտքի ներման հարցը ուղիղ կապ չունի ռազմաբազայի տեղակայման ժամկետների երկարաձգման հետ: «Պարտքը վերանայվում է այն բանակցությունների համատեքստում, որոնք տարվում են վերջին 15 տարիներին: Եվ այն, որ դա ուղիղ կապվում է ռազմաբազայի հետ, իրավիճակի աղավաղում է»,- նշեց նա:
Ըստ Սերգեյ Միխեևի՝ շատ հնարավոր է, որ պարտքի ներման հարցը կապ ունի Բիշքեկի «Մանաս» օդանավակայանում տեղակայված ամերիկյան ռազմաբազայի լիկվիդացման պարտավորության հետ, որը ստանձնել է Ղրղըզստանը: «Դա ավելի լուրջ պատճառ է ռազմաբազայի ժամկետը երկարացնելու համար»,- ասաց փորձագետը: Ըստ նրա՝ ռազմաբազայի վերաբերյալ համաձայնագիրը կնքված էր նախքան Պուտինի կատարած այցը Ղրղըզստան և նախքան պարտքերի հարցի քննարկումը:
Հարցին, թե ինչու այդ դեպքում Ռուսաստանը չի ներում իր ռազմավարական գործընկերոջ՝ Հայաստանի պարտքը, հատկապես, որ Հայաստանում գտնվող ռուսական ռազմաբազայի ծախսերը հոգում է հայկական կողմը՝ Միխեևը նշեց. «Հայաստանի համար Ռուսաստանի հետ համագործակցությունը անվտանգության հարց է: Ղրղըզստանի համար այդ հարցը չկա: Ղրղըզստանը չունի արտաքին թշնամիներ, իսկ Հայաստանն ունի: Այդ պատճառով էլ Հայաստանի և Ղրղըզստանի դեպքերը համեմատելն այնքան էլ կոռեկտ չէ: Ղրղըզստանը կարող է չմտածել բազաների մասին, քանի որ չունի չլուծված տարածքային խնդիր, պատերազմական իրավիճակում չի գտնվում հարևանների հետ»:
