Լիբիայի առաջնորդ Մուամար Քադաֆին երեկ հարցազրույց է տվել մի քանի լրատվամիջոցների: Քադաֆին հայտարարել է, որ իր ժողովուրդն իրեն սիրում է և ամեն ինչ կանի պաշտպանելու համար իր առաջնորդին: Այս մասին հաղորդում է Times-ը: «Իմ մարդիկ սիրում են ինձ և կմեռնեն, միայն թե պաշտպանեն ինձ»,- հայտարարել է Քադաֆին:
Թեպետ Քադաֆիի և նրա որդու` Սայֆ Ալ-Իսլամի ասածները հաճախ կրում են բացահայտ թշնամական բնույթ, և նրանք հայտարարում են, թե պատրաստ են մինչև վերջ վերացնել իրենց հակառակորդներին, սակայն երեկ հայտնի է դարձել, որ Քադաֆին հանձնարարել է հետախուզության ծառայության ղեկավարին բանակցություններ սկսել ապստամբների հետ: Ըստ որոշ տեղեկությունների` այդ բանակցությունները տեղի են ունենալու Քադաֆիի ներկայացուցչի և երկրի արևելքում ձևավորված ժամանակավոր կառավարության ղեկավար, արդարադատության նախկին նախարար Մուստաֆա Աբդ Ալ-Ջալիլի միջև:
Ինչպես գրում է իտալական La Repubblica-ն, Քադաֆին նաև դեմ չէ, որ Լիբիայում աշխատեն ՄԱԿ-ի և միջազգային այլ կազմակերպությունների ներկայացուցիչները: Լրագրողների հետ հանդիպման ժամանակ Քադաֆին ասել է, որ պատրաստ է ընդունել միջազգային դիտորդներին, որոնք կարող են տեղում ուսումնասիրել ստեղծված իրավիճակը:
Ակնհայտ է, որ վերջին մի քանի զիջումները շատ էական են, եթե հաշվի առնենք, որ միջազգային և ոչ մի կառույց չէր կարողանում տեղում գնահատել իրավիճակը, ինչպես նաև Քադաֆին մինչև հիմա չէր ընդունում, որ երկրում կա ընդդիմություն` նրանց անվանելով թմրանյութերի ազդեցության տակ գտնվող մի խումբ երիտասարդներ:
