Ղրղըզստանը Ռուսաստանին համարում է իր կարևոր ռազմավարական գործընկերը բոլոր ուղղություններով և իր անվտանգության երաշխավորը: Այս մասին հայտարարել է Ղրղըզստանի Հանրապետության արտգործնախարար Էրլան Աբդիլդաևը` Ռուսաստանի նախագահ Վլադիմիր Պուտինի այցի նախօրեին :
«Առաջին հերթին, անկասկած, Ռուսաստանը մեր կարևորագույն ռազմավարական գործընկերն է բոլոր ուղղություններով՝ քաղաքական, տնտեսական, մշակութային, գիտատեխնիկական, ռազմատեխնիկական, մեր անկախության բոլոր տարիներին»,- նշել է նա АКИpress-ին տված հարցազրույցում:
«Երկրորդ` պետք է նկատի ունենալ, որ Ռուսաստանը և նրա վարած քաղաքականությունը կայունության կարևոր գործոն են մեր տարածաշրջանում, ու եթե կուզեք՝ մեր տարածաշրջանում բազմակողմ ու երկկողմ համագործակցության շրջանակներում անվտանգության երաշխավորը այնպիսի կազմակերպություններում, ինչպիսիք են ԱՊՀ-ն, ՀԱՊԿ-ը ու Շանհայը»,- հավելել է Աբդիլդաևը:
«Մեր երկկողմ առևտրաշրջանառությունը 2012թ. առաջին կեսին կազմել է 907,4 մլն դոլար ու աճել 32,7% -ով՝ անցած տարվա համեմատ»,- ընդգծել է ղրղըզ նախարարը:
Նշենք, որ ՌԴ նախագահը Ղրղըզստան կայցելի սեպտեմբերի 20-ին:
