Սեպտեմբերի 18-ին լույս է տեսել ծագումով հնդիկ, բրիտանացի գրող Սալման Ռուշդիի ինքնակենսագրությունը: Այս մասին հայտնում է Agence France-Presse-ը:
«Ժոզեֆ Անտոն» կոչվող գիրքը նվիրված է գրողի կյանքին նրա «Սատանայական բանաստեղծություններ» գրքի լույս տեսնելուց հետո: Վեպը համարվեց վիրավորական Իսլամի համար, և դրա լույս տեսնելուց մեկ տարի անց իրանցի այաթոլլա Խոմեյնին կոչ արեց սպանել Սալման Ռուշդիին` դա անվանելով «աստավծահաճո գործ»:
Գրքի անունը Սալման Ռուշդիի ծածկանունն է, որով նա թաքնվում էր այաթոլլայի կամքը կատարել ցանկացողներից: Ինքնակենսագրությունը գրված է երրորդ դեմքով:
Գրքում, մասնավորապես, պատմվում է, թե ինչպես են սպանվել «Սատանայական բանաստեղծությունները» ճապոներեն և իտալերեն թարգմանողները:
1998-ին Իրանը հավաստիացրեց Բրիտանիայի կառավարությանը, որ չի փորձի ի կատար ածել Ռուշդիին սպանելու այաթոլլա Խոմեյնիի կոչը: Դրանից հետո Ռուշդին տեղափոխվեց Նյու Յորք: Սակայն իսլամական կրոնական կազմակերպությունները գրողի գլխի համար պարգևավճար խաստացան: 2012-ի սեպտեմբերի 16-ին խոստացված գումարը մեծացավ` հասնելով 3,3 մլն դոլարի:
