Ֆրանսիայի «Նոր Յառաջ» թերթը գրում է, որ սեպտեմբերի 18-ին Թուրքիան Բեռնի իր դեսպանատանը կազմակերպել է դասախոսություն, որին հրավիրված են ոչ միայն Շվեյցարիա-Թուրքիա բարեկամության խմբի անդամները, խորհրդարանականներ, այլև Հայոց ցեղասպանությունը ժխտող, ամերիկացի «պատմագետ» ՄաքԳարթին: Վերջինս, պատմությունը խեղաթյուրող թուրքամետ իր թեզերից բացի, հինգ տարի առաջ ի նպաստ թուրք քաղաքական գործիչ Դողու Փերինչեքի էր վկայություն տվել նրա դատավարությանը՝ կրկին պաշտպանելով թուրքական տեսակետը:
Հայոց ցեղասպանության մասնագետ, պատմաբան Հանս Լուկաս Քեզերը մերժել է իրեն ուղղված հրավերը, որով նախատեսվում էր նաև հանդիպում ՄաքԳարթիի հետ: Քեզերն ասել է. «Ճիշտ կլինի չընդառաջել դեսպանատան այս հրավերին, որը, շահագործելով դիվանագիտական իր կարգավիճակը, ուզում է նեղ կացության մատնել շվեյցարական օրենսդրությունը»:
Հիշեցնենք, որ Շվեյցարիայում օրենքով արգելված է Հայոց Ցեղասպանության ժխտումը, սակայն դեսպանատան տարածքները համարվում են իրենց ներկայացրած երկրի մասը:
