Նախագահի PR-ն իր ազդեցությունը չի ունենա, եթե դրա արդյունքում չտեսնենք դրանից ազդված նախարարների համապատասխան գործողություններ: «Առաջին լրատվական»-ի հետ զրույցում այս մասին ասաց «Ազատ դեմոկրատներ» կուսակցության փոխնախագահ, քաղաքագետ Անուշ Սեդրակյանը՝ անդրադառնալով շաբաթ օրը ՀՀ նախագահ Սերժ Սարգսյանի հրավիրած խորհրդակցության քաղաքական ենթատեքստին:
Նա նկատեց` պարտադիր չէ, որ քաղաքական գործիչները անպայման ունենան PR, առավելապես նման ակցիաներ և ելույթներ պետք է իրականացնեն երկրի ղեկավարները: Ըստ Ա. Սեդրակյանի՝ այլ հարց է, որ գոյություն ունի արևմտյան PR, երբ քաղաքական գործիչների խոստումները անպայման կատարվում են և համապատասխանում PR ակցիային: Կան նաև PR-ի արևելյան, ռուսական, հայկական տարբերակներ, և այս դեպքերում դրանք արվում են առանց հետագա բարեփոխումների հեռանկարի:
«ՀՀ նախագահի PR-ն իր էֆեկտը չի ունենա, եթե դրանից հետո մենք չունենանք գոնե այդ նկատողություններից ազդված նախարարների գործողություններ: Ինչ վերաբերում է PR-ի ֆորմալ մասին, ապա պետք էր գոնե PR-ի ոգին պահել, որովհետև ֆորմալ առումով դա այնքան էլ հաջողված չէր: Իհարկե, այն, որ նախագահը նկատողություն է անում կառավարությանը, շատ հաջողակ PR է, բայց ոչ այդ դրսևորման մեջ»,- մեկնաբանեց Անուշ Սեդրակյանը:
Վերջինս հակված է մտածելու, որ Հայաստանում պետք է փոփոխություններ կատարվեն, ինչն արդեն անխուսափելի գործընթաց է: Ուստի Անուշ Սեդրակյանը ցանկություն հայտնեց, որ այդ փոփոխություններն իրականացվեն առանց ավելորդ աղմուկների և ավելի արդյունավետ:
Անդրադառնալով շրջանառվող այն տեսակետներին, թե նախագահի հրավիրած խորհրդակցության նպատակը կառավարության հետագա փոփոխությունն է, «Ազատ դեմոկրատներ» կուսակցության փոխնախագահն ասաց` այդ դեպքում նման աղմկահարույց ելույթ չէր լինի: Ըստ նրա՝ սովոր ենք, որ Հայաստանում կադրային փոփոխությունները լինեն պատահական, միանգամից և անհասկանալի:
«Հրապարակային ելույթը կառավարությունը պահելու միտում ունի, ցույց տալու, որ կառավարությունը բացարձակապես վերահսկելի է»,- նկատեց Անուշ Սեդրակյանը:
Հիշեցնենք, որ շաբաթ օրը տեղի ունեցած խորհրդակցության ժամանակ ՀՀ նախագահ Սերժ Սարգսյանը խստորեն քննադատեց ՀՀ կառավարության և խորհրդակցությանը ներկա մի շարք նախարարությունների ղեկավարների աշխատանքը:
