Կոնֆլիկտային գոտիներում անցկացվող յուրաքանչյուր զորավարժություն հասկանալի պատճառներով տարաբնույթ մեկնաբանությունների տեղիք է տալիս։
Անկախ հնչող գնահատականներից՝ Արմավիրում մեկնարկված ՀԱՊԿ զորավարժությունների անցկացումը լավագույն վկայությունն է այն հանգամանքի, որ ՀՀ-ն հետևողական է ՀԱՊԿ ռազմաքաղաքական կառույցի նկատմամբ ստանձնած պարտավորությունների կատարման հարցում։ Այս մասին «Առաջին լրատվական»-ի հետ զրույցում ասաց ՀՀ ԳԱԱ Արևելագիտության ինստիտուտի ավագ գիտաշխատող Վահրամ Տեր-Մաթևոսյանը՝ անդրադառնալով ՀԱՊԿ շրջանակում այս օրերին իրականացվող զորավարժություններին:
Վահրամ Տեր-Մաթևոսյանը նկատեց, որ վերջին շաբաթների ընթացքում տարածաշրջանում ռազմաքաղաքական մթնոլորտը բավական լարված է, ուստի նախապես ծրագրված զորավարժությունները կարող են լիցքաթափել ստեղծված լարվածությունը։
Նա նաև հիշեցրեց ՀՀ ներդրած ջանքերը 2009թ.-ին ՀԱՊԿ-ի արագ արձագանքման ուժերի ստեղծման գործում: «Լիիրավ կարող ենք պնդել, որ ՀԱՊԿ-ի կառույցում այս միավորումը հավակնում է դառնալ ամենակազմակերպվածներից մեկը, որը լուրջ ազդակ կհանդիսանա տարածաշրջանում արկածախնդրություն փնտրողների համար։
Հայաստանը` որպես ՀԱՊԿ անդամ, ձգտում է առավելագույնի հասցնել իր անվտանգության երաշխիքները, անում է հնարավորը՝ ակնկալելով, որ տարածաշրջանում անվտանգության խաթարման դեպքում գործընկերները լիարժեքորեն կկատարեն դաշնակցային պարտավորությունները»,- մեկնաբանեց Վահրամ Տեր-Մաթևոսյանը՝ ընդգծելով, որ զորավարժությունների անցկացումը միտված է նաև զորավարժություններ անցկացնող ուժերի միջև փոխգործակցության մեխանիզմների հղկմանը, օպերատիվ-տակտիկական պլանների փորձարկմանը և այլն։
Անդրադառնալով հարցին` հնարավո՞ր է, որ զորավարժություններն անդրադառնան վրաց-հայկական հարաբերությունների վրա, Վահրամ Տեր-Մաթևոսյանն ասաց, որ զորավարժությունները ուղղակիորեն չեն անդրադառնա հայ-վրացական հարաբերությունների վրա: Ըստ նրա՝ սա առաջին առիթը չէ, երբ երկրները ի ցույց են դրել իրենց ռազմաքաղաքական կողմնորոշումները։
«Իհարկե, վրացի մեր գործընկերները կարող են տարաբնույթ մեկնաբանություններ անել, սակայն նրանք էլ քաջ գիտակցում են, որ անվտանգության ապահովումը ցանկացած ինքնիշխան երկրի համար գերակա ու անքննելի պետական շահ է, ուստի անվտանգության ռազմավարության իրականացման հարցում ՀՀ-ն շարժվում է` հաշվի առնելով բացառապես իր և ԼՂՀ շահերը»,- իր խոսքը եզրափակեց ՀՀ ԳԱԱ Արևելագիտության ինստիտուտի ավագ գիտաշխատող Վահրամ Տեր-Մաթևոսյանը:
Հիշեցնենք, որ այսօր Ռուսաստանի հարավային ռազմական շրջանում մեկնարկում են «Կովկաս-2012» ռազմավարական-մարտավարաջոկատային զորավարժությունները: Զորավարժություններին կմասնակցեն 8 հազար մարդ, 200 ռազմական մեքենա, 100 թնդանոթ և 10 ռազմանավ ու արագանավ:
Բացի ՌԴ-ի զինված ուժերից` զորավարժություններին կմասնակցեն Դաշնային պաշտպանության օպերատիվ խմբերը, ՆԳՆ-ն, ԱԻՆ-ը և Ռուսաստանի անվտանգության Դաշնային ծառայության խմբերը:
Սեպտեմբերի 15-ին ՀԱՊԿ օպերատիվ արձագանքման հավաքական ուժերի մասնակցությամբ մեկնարկեցին նաև «Փոխգործակցություն 2012» զորավարժությունները ՀՀ-ում: Զորավարժություններին մասնակցում են 2000 զինվորական` ՀԱՊԿ անդամ երկրներից:
