Այսօր ԱԺ քառօրյա նիստին ՀՅԴ խմբակցության պատգամավոր Արծվիկ Մինասյանը և Արա Նռանյանը ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանի առաջ հարց բարձրացրին գնաճի վերաբերյալ, ինչին ի պատասխան Շաբոյանն ասաց, որ իրենք գների բարձրացման համար պատասխանատվություն չեն կրում, և իրենց գործառույթը գների վերահսկողությունն է, ինչն էլ փորձում են իրականացնել, սակայն իրականությունը ցույց է տալիս, որ այդ վերահսկողությունը ոչինչ չի անում գնաճի կանխարգելման ուղղությամբ:
Արծվիկ Մինասյանը նկատեց, որ կենտրոնացվածությունը 2009-2010 թվականներին նույն է մնացել, ինչը նշանակում է, որ տվյալ շուկան չի փոխվում, այսինքն՝ գերիշխողները շարունակում են գերիշխող դիրքում մնալ՝ իրենց տեղը չզիջելով մյուսներին, և այլ գործարարների համար ինքնաարտահայտվելու հնարավորություն չի ստեղծվում:
Պատասխանելով այս հարցին՝ Արտակ Շաբոյանը նկատեց, որ եթե շուկայի կայունացվածությունը չի փոխվում, դա չի նշանակում, թե շուկան չի զարգանում: Նրա խոսքերով, օրենսդրության համաձայն, մենաշնորհ են համարվում շուկայի 100 տոկոսը զբաղեցնողները:
