Սեպտեմբերի 17-ին Ադրբեջանի նախագահ Իլհամ Ալիևը կայցելի Փարիզ: Արդեն իսկ հրապարակված օրակարգում նշված է, որ հանդիպելու են երկու երկրների նախագահները: Քննարկվելու են հիմնականում երկկողմ հարաբերություններին և ԼՂՀ-ի հետ կապված խնդիրներին առնչվող հարցեր.
«Ես ենթադրում եմ, որ իսկապես Ալիևի համար դժվար է լինելու Փարիզում, որովհետև բոլոր այն ջանքերը, որ Ֆրանսիան երկար տարիներ ներդրել է, հիմա Ադրբեջանի պատճառով վտանգի տակ են»,-այսօր լրագրողների հետ հանդիպմանը ասաց քաղաքագետ Հրանտ Մելիք-Շահնազարյանը:
Նրա կարծիքով՝ Ֆրանսիան թույլ չի տա, որ ադրբեջանական և թուրքական գործոնը գլուխ բարձրացնի Հարավային Կովկասում:
Քաղաքագետը նշեց, որ ֆրանսիական կողմը արդեն իր մտահոգությունն է հայտնել` կապված տարածաշրջանում առկա լարվածության հետ: Ըստ նրա` Ֆրանսիայի համար կարևոր է Ադրբեջանից որոշակի երաշխիքներ ստանալ կայունությունը պահպանելու ուղղությամբ. «Ֆրանսիայում լուրջ խնդիր է սեղմել այնպիսի նախագահի ձեռքը, ով հերոսացրել է մարդասպանին: Այս առումով Ֆրանսիայի նախագահը կանգնած է լուրջ բարոյական խնդրի առաջ»:
Անդրադառնալով Սաֆարովի էքստրադիցիային` բանախոսը նկատեց` եթե դժգոհությունների այն ալիքը, որը ներկայումս կա և ուղղված է Ադրբեջանի դեմ, իսկապես հաջողվի ուղղորդել ճիշտ հունով և դարձնել գործոն՝ Արևմուտքում հայամետ դիրքեր ձևավորելու համար, բանակցային գործընթացում փոփոխություններ կմտցվեն. «Եթե հայի սպանությունը Ադրբեջանում խրախուսվում է և համարվում հերոսական գործողություն, ապա ադրբեջանցիների հետ ցանկացած կարգի համակեցություն անհնար է»:
