Հավաքական անվտանգության պայմանագրի կազմակերպության (ՀԱՊԿ) միացյալ շտաբի ղեկավարի պաշտոնում կառաջարկվի Ռուսաստանի օդադեսանտային զորքերի հրամանատար, գեներալ-գնդապետ Անատոլի Շամանովի և մի քանի այլ բարձրաստիճան հրամանատարների թեկնածությունը: Այս մասին RIA Novosti-ին հայտնել է ՀԱՊԿ գլխավոր քարտուղար Նիկոլայ Բորդյուժան:
Ավելի վաղ Ռուսաստանի գլխավոր շտաբի բարձրաստիճան պաշտոնյան գործակալությանը հայտնել էր, որ ՀԱՊԿ միացյալ շտաբի ղեկավարությունը կարող է փոխվել մինչև տարեվերջ, մասնավորապես՝ կբարձրանա միացյալ շտաբի ղեկավարի պաշտոնի կարգավիճակը, որի համաձայն՝ այդ պաշտոնում մշտական հիմունքներով կնշանակվեն բարձրագույն հրամանատարության սպաներ՝ գլխավոր շտաբի պետի տեղակալների մակարդակով:
Այս պահին ՀԱՊԿ միացյալ շտաբի հրամանատարությունը միավորված է. ՀԱՊԿ համատեղ անվտանգության խորհրդի որոշմամբ՝ այդ պաշտոնում միջնստաշրջանային ժամանակահատվածում նշանակվում է կազմակերպության անդամ երկրներից մեկի գլխավոր շտաբի պետը:
«Մենք դեռ մի քանի ազգանուններ ունենք, դրանք համաձայնեցվել են, և այժմ դեռ կհամաձայնեցվեն, կարող եմ միայն ասել, որ այդ պաշտոնում թեկնածուներից մեկը գեներալ-գնդապետ Շամանովն է»,- ասել է Բորդյուժան: Ընդ որում, առայժմ հայտնի չէ՝ կմնա՞ Շամանովը օդադեսանտային զորքերի հրամանտարի պաշտոնում, եթե առաջադրվի ՀԱՊԿ միացյալ շտաբի պետի պաշտոնում:
Գործակալության զրուցակիցն ընդգծել է, որ ՀԱՊԿ-ն առաջարկում է կառույցի ղեկավար նշանակել մշտական հիմունքով: «Իմ տարբերակն այսպիսին է. միացյալ շտաբի ղեկավարը կլինի մշտական հիմունքով, մենք կառաջարկենք այս գաղափարը հաստատման համար, սակայն վերջնական որոշումն, այնուամենայնիվ, կմնա նախագահներին»,- ասել է գլխավոր քարտուղարը:
Նրա խոսքերով՝ շտաբի նոր ղեկավարի նշանակումը և միացյալ շտաբի աշխատանքների ձևաչափի փոփոխությունը կքննարկվի 2012 թ. դեկտեմբերի 19-ին Մոսկվայում կայանալիք կազմակերպության նիստում: Այժմ ՀԱՊԿ միացյալ շտաբի ղեկավարի պաշտոնը զբաղեցնում է Ղազախստանի պաշտպանության փոխնախարար, գեներալ-գնդապետ Սական Ժասուզակովը:
ՀԱՊԿ միացյալ շտաբը կազմակերպության մշտական գործող մարմին է, որը պատասխանատու է ՀԱՊԿ ռազմական բաղադրիչների հարցերով առաջարկների նախապատրաստման և որոշումների իրականացման համար:
ՀԱՊԿ-ը հիմնվել է Հավաքական անվտանգության պայմանագրի հիման վրա, որը ստորագրվել է 1992 թ. մայիսի 15-ին ԱՊՀ անդամ երկրների կողմից: ՀԱՊԿ-ի կազմի մեջ են մտնում Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը: