Այսօր, սեպտեմբերի 16-ին, արտակարգ դեպք է տեղի ունեցել Կոտայքի մարզում: Ժամը 17:50-ի սահմաններում ոստիկանության Նաիրիի բաժին ահազանգ է ստացվել, որ Եղվարդ քաղաքի Շիրակի փողոցի 8 ա շենքի 4-րդ բնակարանում ամուսինների միջև վիճաբանություն է տեղի ունենում:
Նշված վայր են մեկնել ոստիկանության Նաիրիի բաժնի օպերատիվ խումբը` Պրոֆիլակտիկայի բաժանմունքի պետ Սարգիս Բաղդասարյանի գլխավորությամբ: Դեպքի վայր էին ժամանել նաև ՀՀ Արտակարգ իրավիճակլների նախարարության Կոտայքի մարզի փրկարար ծառայության Եղվարդի հրշեջ-փրկարարական ջոկատը`մեկ մարտական հաշվարկով:
Ֆոտոլրագրող Գագիկ Շամշյանը shamshyan.com-ին հայտնել է, որ ոստիկանության ծառայողները մտնելով նշված բնակարան, կարողանում են բնակարանում վնասազերծել 78-ամյա Գուրգեն Գաբրիելյանին, ով փորձում էր դանակով ինքնասպան լինել:
Գ. Շամշյանը հայտնել է, որ մինչ այդ, սակայն, ամուսինը կենցաղային հարցերի շուրջ վիճաբանել է կնոջ`69-ամյա Սյուզաննա Գաբրիելյանի հետ, կոտրել տան ողջ գույքի հիմնական մասը, իսկ հետո էլ հրկիզել տունը: Բարեբախտաբար, մի քանի հարևաններ ոստիկանների և հրշեջների հետ կարողացել են մարել կրակը, հակառակ դեպքում այն կտարածվեր:
Հարևանները Գ. Շամշյանին պատմել են, որ ամուսինները թոշակառու են և ունեն մեկ որդի: Փաստի առթիվ ոստիկանության Նաիրիի բաժնում հետաքննություն է կատարվում:
