Hetq.am-ն օրեր առաջ հաղորդել էր, որ սեպտեմբերի 6-ին Միացյալ Նահանգների Նյու Յորքի հարավային շրջանի Դատական ակտերի կատարման ծառայությունը կատարման է տրամադրել Կատարողական թերթ՝ Վարդան Այվազյանի հանդեպ կատարման համար հօգուտ «Գլոբալ Գոլդ Մայնինգ» ՍՊԸ-ի (ԳԳՄ)։ Վարդան Այվազյանից պետք է գանձվի երեսունյոթ միլիոն հինգ հարյուր երեսունյոթ հազար ինը հարյուր յոթանասունութ ԱՄՆ դոլար և երկու ցենտ ($37,537,978.02):
«Առաջին լրատվական»-ի հետ զրույցում Վարդան Այվազյանի գործի իրավական հետևանքներից խոսեց փաստաբան Արա Ղազարյանը: Վերջինս պարզաբանեց, որ այս գործով երկու վարույթ է տեղի ունեցել, մեկը՝ Միջազգային արբիտրաժային դատարանի վարույթն է, մյուսը՝ ԱՄՆ: Ըստ նրա՝ ԱՄՆ դատարանի վերոնշյալ կատարողական թերթը հնարավոր չէ կատարել, որովհետև Հայաստանի և ԱՄՆ-ի միջև երկկողմանի, միջպետական պայմանագիր չկա դատական ակտերը ճանաչելու և կատարելու վերաբերյալ: «Քանի դեռ միջազգային արբիտրաժ դատարանի որոշումը չկա այս գործով, ԱՄՆ այս դատական ակտը հնարավոր չէ կատարել: Արբիտրաժային դատարանը, որոշման դեպքում, կդիմի ՀՀ իշխանություններին, որ իշխանությունները ճանաչեն և կատարեն այդ որոշումը: Այս դեպքում Վարդան Այվազյանի գույքը կվերցվի կալանքի տակ, հետո այդ գույքից կհանվեն գումարները: Հայաստանի ու ԱՄՆ-ի միջև վճիռների կատարման մեխանիզմ չկա, սակայն հենց Վարդան Այվազյանը մուտք գործի ԱՄՆ, արդեն կգտնվի ԱՄՆ իրավազորության ներքո և կարող են նրա նկատմամբ հարկադրանք կիրառել»,- ասաց Արա Ղազարյանը:
Նա նշեց, որ ԱՄՆ մուտք գործելու դեպքում Վարդան Այվազյանի հետ կարող է կրկնվել Թաթուլ Մանասերյանի դեպքը, երբ ԱԺ պատգամավոր Թաթուլ Մանասերյանին ԱՄՆ մուտք գործելու համար ձերբակալեցին, որի արդյունքում մի քանի ամիս նա կալանավայրում անցկացրեց. «Այսինքն՝ այնտեղ ընտանեկան վեճ էր եղել, ԱՄՆ դատարանի որոշումը կար երեխային առանց թույլտվության Հայաստան բերելու համար, անկախ նրանից, որ նա ԱԺ պատգամավոր էր, նրան ձերբակալեցին ԱՄՆ-ում և կալանավորեցին: Այսինքն՝ դա սկզբունքորեն հնարավոր է»:
Փաստաբան Արա Ղազարյանը նկատեց, որ այս ամբողջ պատմության մեջ այն, որ Վարդան Այվազյանը պատգամավոր է, ամենավերջին տեղում է:
Հիշեցնենք, որ «Գլոբալ Գոլդ Մայնինգ» ընկերության դուստր ընկերություններից մեկը ենթարկվել էր կոռուպցիոն դրսևորումների Հայաստանի բնապահպանության նախկին նախարար Վարդան Այվազյանի կողմից։ Ընկերությունը տեղեկացրել էր այդ իրավիճակի մասին Հայաստանի և Միացյալ Նահանգների համապատասխան մարմիններին: Արդյունքում ընկերությունը Այվազյանի պատճառով կորցրել էր Հանքավանի հանքավայրի նկատմամբ հսկողությունը։
