«100 տարի Թուրքիան և նրա նմանները բռնություն են գործադրում իրենց հարցերը լուծելու համար»,- սեպտեմբերի 14-ին Մոսկվայում Հունգարիայի կողմից ցմահ բանտարկության դատապարտված Ռամիլ Սաֆարովի արտահանձնման և Ադրբեջանում նրա ներման դեմ կազմակերպված ցույցի ժամանակ հայտարարել է Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին, փոխանցում է ИА REGNUM-ի թղթակիցը:
Հայերի ցեղասպանությունը հիշելով` Ժիրինովսկին նշել է, որ «օգտվելով առիթից, որ մնացած պետությունների ուշադրությունը կենտրոնացած էր Առաջին աշխարհամարտի իրադարձությունների վրա` Թուրքիան լուծել է իր ներքին խնդիրները»:
Ժիրինովսկին հայ օլիգարխներին կոչ է արել ժլատություն չանել և ներդրումներ անել հայկական բանակում:
Քաղաքական գործիչը նշել է, որ ստեղծված իրավիճակում հայերը պետք է «խելքի գան» և պաշտպանվեն: Նա վստահ է, որ անհրաժեշտության դեպքում Ռուսաստանը 100%-ով կպաշտպանի Հայաստանին:
Վլադիմիր Ժիրինովսկին Հայաստանին աջակցություն է հայտնել «արդարության համար պայքարում», Եվրոպային անվանել է «ծախու» և «փողի դիմաց այս կամ այն որոշում ընդունող», տվյալ դեպքում` հանցագործի արտահանձնման վերաբերյալ:
Քաղաքական գործիչը նշել է, որ իր կուսակցությունը միշտ աջակցել է և կաջակցի հայերին, սակայն ինքն էլ հայերի աջակցության հույսն ունի:
Ակցիան կազմակերպել էր «Ռուս-հայկական համայնք» կազմակերպությունը: Այն համաձայնեցվել էր Մոսկվայի քաղաքապետարանի հետ:
