Intel ընկերությունը մշակել է սմարթֆոնների, պլանշետների և ծնկադիր համակարգիչների համար նախատեսված կենսաչափական սենսորներ և ծրագրային ապահովում, որոնք թույլ կտան օգտատերերին ազատվել հեռախոսային ծառայությունների և սարքավորումն արգելափակված վիճակից դուրս բերելու համար օգտագործվող գաղտնաբառերից:
Բավական կլինի միայն ձեռքով մի շարժում անել, որպեսզի խորհրդանիշերի համապատասխան կոմբինացիան կարդացվի, հաղորդում է Вести.Ru-ն: Այժմ Intel-ը պատրաստվում է «աշխատել ծառայություններ մատուցողների» հետ, որպեսզի ծրագիրն ունենա տեխնոլոգիական լիարժեք աջակցություն և արագորեն ինտեգրվի:
Այս տեխնոլոգիայի կիրառման շնորհիվ հնարավոր է հաշվարկել մարդու ափի երակների դասավորությունը: «Մենք օգտագործում ենք բազմաթիվ գաղտնաբառեր, որոնք դժվար է հիշել, քանի որ բարդ են: Կենսաչափական սկանը լավագույն տարբերակն է այդ խնդրի լուծման համար»,- մեկնաբանել է Intel ընկերության բաժնի ղեկավար Շրիդհար Այենգարը:
Տեխնոլոգիան արդեն ցուցադրվել է Սան-Ֆրանցիսկոյում տեղի ունեցած ծրագրեր մշակողների ֆորումում. միայն ձեռքը սահեցնելով սենսորային էկրանին՝ հեռախոսը «ճանաչել» է տիրոջը և հնարավորություն տվել առանց գաղտնաբառի այցելել տարբեր կայքերի օգտահաշիվներ:
Երբ մարդը դադարում է սարքավորումն օգտագործել, համակարգն ավտոմատ կերպով դուրս է գալիս գրառումներից, որպեսզի կողմնակի անձինք չկարողանան կարդալ անձնական տեղեկատվությունը:
Տեխնոլոգիան դեռևս պատրաստ չէ լայն կիրառման համար: