ՀՀ գլխավոր դատախազի՝ Աղվան Հովսեփյանի եղբայրը` Ռուբեն Հովսեփյանը, ԱԺ-ում նոր պատգամավորներից է: Նա ընտրվեց ՀՀԿ-ական Հարություն Փամբուկյանի տարածքում, կարելի է ասել՝ նրա փոխարեն: Ռուբեն Հովսեփյանը չի հերքում, որ պատգամավոր է ընտրվել նաև եղբոր աջակցությամբ: Ի դեպ, նրա շտաբի պետը պետական պաշտոնյա, Պետգույքի կառավարման վարչության ղեկավար Արման Սահակյանն էր: Երեկ «Առաջին լրատվական»-ը զրուցեց Ռուբեն Հովսեփյանի հետ:
– Պարոն Հովսեփյան, այսօր ստացվում է, Դուք Ձեր եղբոր ներկայացուցի՞չն եք ԱԺ-ում:
– Ո՛չ: Ես 6 տարի աշխատել եմ որպես թաղապետ, հետո որպես վարչական շրջանի ղեկավար: Դուք` որպես լրագրող կամ բնակիչ, եթե տեղյակ եք թաղամասից, գո՞հ եք, թե՞ դժգոհ եք իմ աշխատանքից:
– Ես այդ տարածքում չեմ բնակվում: Ուզում եք ասել՝ Ձեր եղբոր ջանքերով չե՞ք ընտրվել:
– Գոնե տեղյակ եղեք իմ աշխատանքից, նոր էդ հարցը տվեք: Ես նորից եմ ասում` վեց ու կես տարի աշխատել եմ, թաղապետ եմ ընտրվել շատ մեծ ձայներով: Այսօր էլ ընտրվել եմ պատգամավոր՝ նույնպես մեծ ձայներով:
– Այնուամենայնիվ, Ձեր եղբոր ներդրումը ձեր ընտրության հարցում որքա՞ն եք գնահատում:
– Բոլորինը՝ շատ մեծ: Համ բնակիչների ներդրումը, համ ընկերների, համ հարազատների, համ եղբայրների, համ ծնողիս:
– Այսինքն՝ շնորհակալ եք դատախազ եղբորից:
– Բոլորից եմ շնորհակալ:
– Ձեր շտաբի պետն էր Պետգույքի կառավարման վարչության պետը՝ Արման Սահակյանը: Ինչպե՞ս հասկանանք, որ պետական պաշտոնյան, համարյա նախարարը ձեր շտաբում էր աշխատում:
– Նախարարը ի՞նչ կապ ունի: Մենք Արմանի հետ միշտ համագործակցել ենք, միասին ենք աշխատել: Ի՞նչ կապ ունի համարյա նախարարը կամ համարյա բանվորը լիներ շտաբի պետ, մենք տարիներով միշտ միասին համագործակցել ենք, բարեկամացել ենք իրար հետ: Հետո Սահակյան Արմանը ՀՀԿ Աջափնյակի ղեկավարն է: Ընտրությունը ոչ միայն իմն էր, այլև կուսակցությանը:
– Նախընտրական շրջանում Ձեր ընտրատարածքում ձու էին բաժանում: Դա Ձե՞ր նախաձեռնությամբ էր, թե՞ Արման Սահակյանի:
– Ինչ վերաբերում է Զատիկին, ամեն տարի շատ մեծ միջոցառումներ ենք կատարել հենց փողոցներում Զատիկի օրը: Ձու էլ ենք բաժանել, ձու էլ ենք ներկել, հրավիրել ենք բոլոր բնակիչներին տարբեր տեղեր:
– Եվ դա չե՞ք համարում ընտրակաշառք:
– Տարբեր տեղերում նույն պրոցեսը կատարվել է, Զատիկ ենք նշել:
– Իսկ թաղապետի՞ աշխատանքն էր Ձեզ ավելի դուր գալիս, թե՞ պատգամավորի:
– Երևի նույնն է: Երկուսն էլ բնակչության հետ շփում է: Էստեղ ավելի լավ կմասնակցենք տեղական ինքնակառավարման խնդիրների բարձրացմանը: Ճիշտ է, այդ հանձնաժողովի մեջ չեմ, բայց իմ լուման էլ կլինի ԱԺ-ում:
– Իսկ ի՞նչ նախաձեռնություններ եք բերել ԱԺ:
– Դուք դրանք կիմանաք հետագայում: Կարող եք սոցիալական հարցերի հանձնաժողովից հարցնել, որի անդամ եմ ես:
– ԱԺ-ում, փաստորեն, Ձեր խնամու՝ Գարեգին Նուշիկյանի հետ եք ընկերություն անում:
– Բոլորի հետ, նաև իր: …Մինչև հիմա լավ ենք իրար հետ:
– Տևական ժամանակ լուրեր են շրջանառվում Ձեր եղբոր հնարավոր պաշտոնանկության մասին: Ի՞նչ կասեք այդ առթիվ:
– Ես նման բան չեմ լսել:
– Պատգամավորի պաշտոնը քաղաքական պաշտոն է: Դուք պատրաստվո՞ւմ եք քաղաքական պրոցեսներում ակտիվություն ցուցաբերել:
– Ընդհանրապես, ես իմ աշխատանքի մեջ էլ եմ ակտիվ: Հենց թաղապետի, վարչական շրջանի ղեկավարի պաշտոնը, կարելի է ասել, քաղաքական պաշտոն է:
– Աշտարակի ընտրությունների առթիվ ասվում է, որ ընտրությունները վերահսկում է գլխավոր դատախազը, անգամ ԲՀԿ-ական դարձած Լյովա Խաչատրյանին ասվել է, որ հեռու մնա տարածքից:
– Նման բան չգիտեմ, իրականում չգիտեմ: Որ իմանայի, կասեի:
– Իսկ ՏԻՄ ընտրություններում կա՞ թեկնածու, ում սատարել եք կամ սատարում եք:
– Ես գտնում եմ, որ գյուղապետերի ընտրությունները պետք է ազատ լինեն: Գյուղացին ում ուզում է` նրան պետք է ընտրի:
