«Սա է իրավիճակը մեր հանրապետության. եթե այսպես շարունակվի, մենք ընկած փոսում ավելի կխրվենք, որովհետև առաջին պատահած զինվորականի մոտ ստեղծվել է տպավորություն, որ արդարություն չկա բանակում, արդարություն չկա կյանքում, արդարություն չկա դատարանում:
Էդպես ապրելը շատ դժվար է, հատկապես` զինվորականի համար: Չի կարելի մեր ջահելներին ի սկզբանե ջարդել, կոտրել, հետո նրանցից ինչ-որ բան պահանջել»,-նշում է ընդամենը մեկուկես ամսվա զինծառայող Մայիս Աղաբաբյանի շահերի ներկայացուցիչ Սեդա Սաֆարյանը:
Նա չի կարողանում ՀՀ Մարտունի քաղաքից ԼՂՀ Մարտունու 3-րդ պաշտպանական շրջան զորակոչված 18-ամյա Մայիս Աղաբաբյանի` վնասված ձախ աչքի հետազոտությունը և բուժումը կազմակերպել: Ինչպես տեղեկացրեց փաստաբանը, համածառայակից Շահեն Աղասյանի կողմից զինվորական գոտու մետաղական մասով հասցված հարվածից Մայիսը միջին ծանրության վնասվածք է ստացել: Այդ մասին նշված է նոր ստացված դատաբժշկական փորձաքննության եզրակացության մեջ: Միջադեպը տեղի է ունեցել անցյալ տարվա օգոստոսի 11-ին. ըստ ՊՆ քննչական մարմնի` զորամասի շարահրապարակում շարքով վազելու ընթացքում, խախտելով զինծառայողների փոխհարաբերությունների կանոնագրքային կանոնները, Շահեն Աղասյանը, ստորացնելով համածառայող, շարքային Մայիս Մելիքի Աղաբաբյանի պատիվն ու արժանապատվությունը, հայհոյել է նրան և զինվորական գոտիով հարվածել վերջինիս դեմքին` պատճառելով մարմնական վնասվածք ձախ աչքի շրջանում: Տուժած զինվորին հաջորդ օրը` օգոստոսի 12-ին, սկզբում տեղափոխել են Մարտունու, ապա` Ստեփանակերտի զինհոսպիտալ, իսկ այնտեղից` ՀՀ ՊՆ Կենտրոնական կլինիկական զինվորական հոսպիտալ: Նախնական հետազոտությունը ցույց է տվել, որ Մայիս Աղաբաբյանի աչքը 7 մմ չափով ճեղքվել է, սակայն այդպես էլ վիրահատություն չի արվել: Որոշ ժամանակ հոսպիտալում պահելուց հետո նրան կրկին հետ են ուղարկել նույն զորամաս` նույն զինվորի հետ միասին ծառայությունը շարունակելու: Ավելին` Շահեն Աղասյանը տուժած զինվորին ասել էր, որ հայրը «խոսացել է», որ նրա աչքը չբուժեն, որովհետև դա ծանր մարմնական վնասվածք է, և եթե բուժեն` ինքը կդատվի: Եվ կարծես թե հենց նման արտահայտություն անելը հաստատվում է համապատասխան մարմինների` ՊՆ-ի, բուժվարչության, քննչական մարմնի արհամարհական գործելաոճով:
Փաստաբան Սեդա Սաֆարյանի, ինչպես նաև դեպքի շուրջ ծավալված աղմուկից հետո մի կերպ հաջողվեց դատարանից վերցնել քրեական գործի նյութերը` ծանոթանալու համար, և տուժած Մայիս Աղաբաբյանին բերել Երևանի հոսպիտալ` աչքի համապատասխան հետազոտություն անցկացնելու: Սակայն այդպես էլ չի հաջողվել դա անել գործով չշահագրգռված որևէ բժշկի միջոցով. մարդիկ խուսափել են օգնել. «…Մենք չհասցրեցինք երիտասարդին ստուգել, որովհետև բժիշկները խուսափում են զինվորական հոսպիտալ մտնելուց: Պատկերացրեք, խայտառակ վիճակ է: Բժշկին խնդրում, ասում ես` մենք նաև ձեր վճարը կանենք… բայց խուսափում են: Ընդհանրապես, մի անկախ բժիշկ չկա, որ նրան տանենք` ստուգի…»,- ասաց փաստաբանը` նշելով, որ նախօրեին իրեն հայտնի է դարձել, որ փետրվարի 23-ին Մայիս Աղաբաբյանին անհայտ պատճառով տարել են պաշտպանության նախարարի մոտ.
«Ես չգիտեմ, թե նա ինչու չի հասցրել տեղեկացնել ինձ: Շատ զարմացած եմ այդ տեսակետից. ես էլ էի ուզում պաշտպանության նախարարի մոտ գնայի ու տեսնեի, թե ինչ հիմնավոր ապացույցներով են գտնում, որ Մայիսի աչքը լիարժեք, նորմալ վիճակում է: Ճիշտն ասած` այն սկզբնական ախտորոշումները, որ մենք ցույց ենք տվել այլ բժիշկների, այդ բժիշկները, համենայնդեպս, ոչ մի լավ խոստում մեզ չեն տվել: Հիմա, թե՛ ռազմաբժշկական հանձնաժողովի նախագահն է, թե՛ զինվորական հոսպիտալի նախագահը, թե՛ ով է նրա հետ եղել` ես չգիտեմ: Գիտեմ, որ Միքայելյանն էլ է (հոսպիտալի գլխավոր բժիշկը) հետը եղել, բայց մնացածին չգիտեմ, թե ովքեր են եղել նախարարի հետ հանդիպմանը: Ասում են, որ հստակ զեկուցվել է նախարարին, թե` Մայիսի աչքը նորմալ տեսնում է: Ինձ շատ զարմացնում է` նախարարը բժիշկ չի, ինչո՞ւ են տարել նախարարի մոտ»:
Փաստաբանը հստակ չգիտի հանդիպման նպատակը, բայց չի բացառում, որ դա կարող է կապված լինել նախարարի կողմից սույն գործով մեղավոր անձանց, օրինակ` հրամկազմին պատժելու կամ արդարացնելու գործընթացի հետ:
Ավելի վաղ ՊՆ լրատվության աղբյուրից հավաստիացրել էին, որ նախարարի պահանջով նշանակվել է կրկնակի բժշկական փորձաքննություն, որը Մ.Աղաբաբյանը պետք է անցներ Երևանում: Ու թեև այդ մասով, ցավոք, դեռ էական առաջընթաց չկա, այդուհանդերձ Սեդա Սաֆարյանը մի լուր էլ է լսել, որ նախարարը ցանկանում է Մայիս Աղաբաբյանի` գոնե ծառայության վայրը փոխել, նույն զինվորի հետագա հնարավոր ճնշումներից զերծ պահելու համար:
Ս.Սաֆարյանը սա ևս դրական տեղաշարժ է համարում. «Գուցե երեխան ընդհանուր մթնոլորտում շատ նյարդային էր, և դա էլ շատ ազդող է եղել նրա վրա: Շատ կարևոր է մարդու հոգեվիճակը` մարդուն կարգի բերելու համար, դա շատ կարևոր շրջադարձ կարող է լինել նրա համար, բայց այնուհանդերձ, շատ առաջնային է աչքի բուժումը, քանի որ աչքի հետ կատակ չեն անում: Ուզում են թաքցնել, որ բանակում այ այսպիսի բան է եղել, բայց շատ ավելի լավ կլինի, որ ընդունեն, որ եղել է. կա մեղադրյալ, ով խոստովանում է, որ առանց որևէ առիթի խփել է Մայիսին: Շատ ցավալի է, որ այդ սադիզմը կա երիտասարդների մեջ` զինվորների շրջանում, և ցանկալի կլիներ, որ պաշտպանության նախարարությունը այս տեսանկյունից միջամտեր նրա աչքի բուժման կուրսը շարունակելու համար, հոգատարության որևէ դրսևորում ունենար: Առանց այն էլ Մայիս Աղաբաբյանը վատ առողջական վիճակով է գնացել բանակ` ողնաշարի խնդիրներ է ունեցել. բերեցին մի փաստաթուղթ, որտեղ Մարտունու զինկոմիսարիատը արձանագրել էր այդ փաստերը, և դա ինձ շատ զարմացրեց, որ նրան տարել են բանակ` սովորական ծառայության: Լավ, տարել` տարել են, բայց հիմա երեխան այս վիճակում է, դա երեխայի համար դժվարություն է: Այսօր ես խոսում եմ նրա հետ ու զգում եմ… ծառայությունը այդ կարգավիճակով շարունակելու խնդիր ունի, ինչը նաև ընկճվածություն է մարդու մոտ առաջ բերում: Շատ դժվար է այդ հոգեվիճակով զինվոր ունենալը…»:
«Ժամանակ» օրաթերթ
