Քաղաքագետ Սուրեն Սուրենյանցի մեկնաբանմամբ՝ Սաֆարովին արտահանձնելը մեր ժամանակների ամենացինիկ գործարքն է. «Իլհամ Ալիևը փորձեց հերոսանալ իր ժողովրդի առաջ, սակայն նա ամենամեծ արջի ծառայությունը մատուցեց ադրբեջանական հասարակությանը, որի պտուղները հետո կերևան»: Այսօր լրագրողների հետ հանդիպմանը Սուրենյանցն ասաց, որ հայկական դիվանագիտությունը սա կարող է օգտագործել՝ ապացուցելու համար, որ սրանից հետո Արցախը ոչ մի կարգավիճակում չի կարող լինել Ադրբեջանի կազմում:
Անդրադառնալով միջազգային արձագանքներին`բանախոսընկատեց, որ դրանցից չարժե շատ ոգևորվել. նրանք բոլորն էլ հետապնդում են իրենց շահը. «ԱՄՆ-ը շատ անհանգիստ է, որովհետև թափթփուկի հետ կապված միջադեպի արդյունքում կարող է պատերազմ վերսկսվել: Նա մտածում է նաև վերադարձնել հայության շրջանում իր հանդեպ ունեցած վստահությունը, քանի որ առջևում ԱՄՆ նախագահական ընտրություններն են»:
Խնդրի հոգեբանական կողմը վերլուծեց մանկավարժական գիտությունների թեկնածու, դոցենտ, հոգեբան Հակոբ Թադևոսյանը: Վերջինիս խոսքով` «Այս հանցագործությունը Ադրբեջանի քաղաքականության արդյունքն է, որն իր հասարակության մեջ դեռ դպրոցից սերմանում է ատելություն հայերի նկատմամբ: Ձևավորվում է թերարժեք հանրույթ, որը Սաֆարովի նմաններին հերոս է որակում միայն նրա համար, որ սպանել է իր թշնամի երկրի սպային»:
Հոգեբանը նկատեց, որայդ հասարակության մեջ ագրեսիան մեծանում է, և կարող են կրկնվել նմանատիպ քայլերը:
