Գյումրուց ընտրված ԲՀԿ-ական պատգամավոր Մարտուն Գրիգորյանն առաջիկայում կդառնա ԱԺ գյուղատնտեսության և բնապահպանության հարցերի մշտական հանձնաժողովի նախագահ` այդ պաշտոնում փոխարինելով Գյումրու քաղաքապետ դարձած Սամվել Բալասանյանին: «Առաջին լրատվական»-ի տեղեկություններով, այդպիսով՝ ԲՀԿ նախագահ Գագիկ Ծառուկյանը փորձելու է Մարտուն Գրիգորյանի սիրտը շահել:
Հայտնի է, որ խորհրդարանական ընտրությունների ժամանակ Գյումրիում ԲՀԿ հաղթանակը ապահովել է Մարտուն Գրիգորյանը, ով նաև պետք է քաղաքապետ դառնար: ՉԻ բացառվում նաև, որ Ծառուկյանը նման խոստում է տվել երիտասարդ պատգամավորին: Սակայն Սերժ Սարգսյանն ու Գագիկ Ծառուկյանը ավելի ուշ որոշել են, որ այդ պաշտոնին ավելի հարմար է Սամվել Բալասանյանը: Ստացվում է՝ Գյումրու ընտրություններում ԲՀԿ-ի հաղթանակն ապահովել է Գրիգորյանը, իսկ դափնիները հասան Բալասանյանին: Դա է թերևս պատճառը, որ քաղաքապետի ընտրություններում Մարտուն Գրիգորյանը չի մասնակցել կուսակցի քարոզարշավին. միայն մեկ անգամ է ներկա եղել, երբ Գյումրի էր այցելել Գագիկ Ծառուկյանը: Ավելին՝ ասվում է, որ նա սատարել է ՀՅԴ թեկնածու Հովսեփ Սիմոնյանին:
