Դիլիջանի համար սողանքները վաղուց արդեն իսկական չարիքի են վերածվել:
«Քաղաքի հատկապես կենտրոնական հատվածը, Մյասնիկյան փողոցի մի զգալի հատված այժմ ուղղակի աղետալի վիճակում են»,- «Առաջին լրատվականին» այս մասին հայտնեց Դիլիջանի «Օրհուս» կենտրոնի անդամ Տիգրան Քեռյանը:
Նորակառույց բաց ամֆիթատրոնը, բնակելի առանձնատները, «Հին Դիլիջան» պատմամշակութային թանգարանը, համայնքային բանուկ ճանապարհը և այլ ենթակառուցվածքներ Դիլիջանում այժմ հրաշքով են գոյատևում, քանի որ սպառնալիքը ուղղակիորեն ամեն օր կախված է քաղաքացիների ու այդ տեղամասերում գտնվող կառույցների սեփականատերերի գլխին:
Դեռևս խորհրդային տարիներին սողանքների դեմն առնելու համար քաղաքում կառուցվել են ջրահեռացման շուրջ 2 կիլոմետրանոց թունելներ, որոնք մինչ այժմ չեն շահագործվել: Ու թեև մինչ այժմ բազմաթիվ պետական հանձնաժողովներ են այցելել և գնահատումներ կատարել Դիլիջանում, ֆինանսական խնդիրների պատճառաբանությամբ դեռ ոչ մի լուրջ քայլ չի ձեռնարկվել:
Քաղաքի բյուջեով հակասողանքային ծրագրեր հիմնականում իրականացրել են հենապատեր կառուցելու միջոցով: Քաղաքում եղել են չնախատեսված դեպքեր, երբ փլվել է մի մեծ հենապատ, որը սպառնում էր քաղաքը երկու մասի բաժանել. հենապատեր են դրել, սակայն սա ընդամենը կոսմետիկ լուծում է:
Եվ որքան էլ զարմանալի է, զբոսաշրջության զարգացման ներուժ ունեցող Դիլիջանում նման օրհասական խնդրին ուշադրություն չեն դարձնում, իսկ եթե դարձնում էլ են, ապա միայն այն ժամանակ, երբ այցելում են այդ տեղամասեր և զարմանք ապրում քաղաքի իրական վիճակից:
