Հիմք ընդունելով 2008 թվականի փետրվարի 6-ի ՀՀ բնապահպանության նախարարության և ՌԴ «Ռոսատոմ» ատոմային էներգիայի պետական կորպորացիայի միջև ուրանի հանքաքարերի երկրաբանական հետախուզման, արդյունահանման և վերամշակման ոլորտում համագործակցության զարգացման վերաբերյալ հուշագիրը` ՀՀ կառավարությունը որոշել է Հայաստանի Հանրապետության տարածքում ուրանի հանքաքարերի երկրաբանական հետախուզման գործունեություն իրականացնել ՌԴ «Ատոմռեդմետզոլոտո» բաց բաժնետիրական ընկերության հետ: Այս նպատակով ՀՀ կառավարությունը թույլատրել է ներդնել Հայաստանի Հանրապետությանը պատկանող երկրաբանական տեղեկատվությունը` 46,120,500 դրամի չափով:
2009 թվականի ապրիլի 23-ին ՀՀ կառավարությունը N 419-Ն որոշմամբ թույլատրել է «Հայ-ռուսական լեռնահանքային կազմակերպություն» ՓԲԸ-ին ՀՀ տարածքում իրականացնել ուրանի հանքաքարի երկրաբանական հետախուզում 5 տարի ժամկետով` ուրանի հանքաքարի հետախուզված հանքավայրերի շահագործման ընթացքում ակնկալվող արտադրանքի բաժանման կամ շահույթի բաշխման հարցերի անդրադարձը թողնելով անորոշ ապագային:
Փաստորեն, անկախ այն հանգամանքից, որ կառավարությունը այդքան ակտիվ քայլեր է ձեռնարկում Սյունիքի մարզում զբոսաշրջության զարգացման և խթանման համար, ամենևին էլ բացասական դիրքորոշում չունի Սյունիքի մարզում ուրանի հանքավայրի շահագործման վերաբերյալ: Հետաքրքիր է միայն, թե ինչպես կարող են մի երկրում ընդունվել միմյանց այդքան հակասող որոշումներ. նախ հայտարարում են, թե Տաթևը Հայաստանի զբոսաշրջության հարավային առանցքի հիմնաքարն է և հրավիրում աջակցել ու ներդրումներ կատարել «Տաթևի վերածնունդ» ծրագրում, այնուհետ նույն տարածքում իրականացնում են ուրանի հանքավայրի երկրաբանահետախուզական աշխատանքներ:
«Տաթևի վանքի համար այնքան գումարներ ծախսվեցին, որպեսզի այնտեղ համալիր լինի, զբոսաշրջիկներ գան, և այլն, սակայն այսօր արդեն այնտեղ հանքավայր են բացում: Այդ ո՞վ պետք է գա այնտեղ, թունավորվի ու գնա: Մի՞թե պարզ չէ, որ զբոսաշրջիկները չեն այցելի մի տարածք, որտեղ ուրանի երկրաբանահետախուզական աշխատանքներ են տարվում»,- խնդրի վերաբերյալ նշում է «Հանուն մարդկային կայուն զարգացման ասոցիացիա» ՀԿ նախագահ Կարինե Դանիելյանը:
Իսկ «Էկոլուր» ՀԿ նախագահ Ինգա Զառաֆյանը հիշեցնում է, որ, հավատարիմ մնալով որդեգրած քաղաքականությանը, պատասխանատուները կշարունակեն պնդել հնչեցրած պարզաբանումները, թե այս փուլում հանքավայրի շահագործում չի սպասվում, և ներկայումս տարվող աշխատանքներն անվնաս են, սակայն մենք ունենք ուրանի պաշարներ, որոնցով զբաղվող ընկերությունը երբեք չի ասում, որ այստեղ ուրանի պաշար ունենք և այլն:
«Այսինքն՝ տարածքը խառնված է, մենք չգիտենք՝ այս տարածքում ուրան կա՞, թե՞ ոչ: Օրինակ՝ նրանք հետազոտել են Լեռնաձոր համայնքի շրջակայքը և ասում են, թե պաշար չեն գտել, բայց չէ՞ որ դուք հետազոտել եք գտնելու համար, այսինքն՝ ուրան կա, արդյունաբերական պաշար չկա: Բայց եթե իրենք ունեն մոտավոր պատկերացում, որ այնտեղ ուրան կա, ինչպես են տալիս ուրիշ հանքարդյունաբերության համար լիցենզիա: Ուրանը հո չի հարցնում՝ հողից ոսկի՞ ես վերցնում, թե՞ ուրիշ բան: Եթե դու գտնես ու հասնես դրան, այն իրեն կարտահայտի»,- ասում է Ինգա Զառաֆյանը:
