Մենք տեսնում ենք, որ սուննի ֆունդամենտալիստական խմբավորումները հավակնում են իշխանության և՛ Սիրիայում, և՛ Լիբիայում: Ֆունդամենտալիստների զինանոցում հնագույն հնարքներից մեկն է օգտագործել հավատքի նկատմամբ ինչ-որ վիրավորանք՝ բռնության ալիք կազմակերպելու համար,- գրում է Դևիդ Ֆրամը ամերիկյան The Daily Beast պարբերականում լույս տեսած հոդվածում: Հեղինակի կարծիքով՝ այդպես նրանք փորձեցին վարվել դանիացի ծաղրանկարիչների հետ, իսկ մինչ այդ այաթոլլա Խոմեյնին փորձեց օգտվել Սալման Ռուշդիի «Սատանայական բանաստեղծություններից»: Մինչև Խոմեյնին նույն հնարքին դիմել էին մի խումբ ամբիցիոզ մոլլաներ և իմամներ:
Այս անգամ դա արժեցավ ականավոր ամերիկացի պետական ծառայողի և դիվանագիտական ևս 3 ներկայացուցիչների կյանքը և նրանց ընտանիքները ներքաշեց խորը ողբերգության մեջ,- շարունակում է հոդվածագիրը:
Մենք նաև հասկանում ենք, թե ինչու է նրանց վրա հարձակում իրականացվել, և ինչու է հարձակում իրականացվել Կահիրեի դեսպանատան վրա: Դա կազմակերպված է եղել տեղի վատ քաղաքական ուժերի կողմից տեղական վնասակար թշնամական նպատակների համար. նրանք ցանկանում են օգտագործել հակաամերիկանիզմը՝ տեղի կառավարություններից իշխանությունը վերցնելու համար: Եթե մենք չենք ցանկանում օգնել այդ քաղաքական ուժերին, մենք պետք է հետևենք, որպեսզի թույլ չտանք նրանց ծրագրերին նպաստող քայլեր:
Հենց դրա համար էլ նախագահ Ջորջ Բուշ կրտսերը միշտ փորձում էր չներքաշվել նման մինի սկանդալների մեջ, դրա համար էլ նախագահ Օբաման օգտագործեց Բուշի ծանոթ մեթոդը՝ կապված պաստոր Ջոնսի հերթական հիմար արարքի հետ, որը տարածում էր իր տեսանյութը և որը դարձավ հակաամերիկյան ելույթների առիթ:
Նույն կերպ կվարվի նաև Ռոմնին, եթե բախվի նույն իրավիճակի հետ:
Այդ մոտեցումը հիմնավորվում է նրանով, որ «վիրավորված մուսուլմանների» ելույթները չափազանց հազվադեպ է, որ տարերային արձագանք են լինում, եթե, իհարկե, ընդհանրապես այդպես լինում է: Դա մոբիլիզացման արդյունք է, և ամերիկացիների առաջ կանգնած հարցը հետևյալն է. արդյո՞ք մենք դրանց կազմակերպիչների հետ ձեռք-ձեռքի տված կխաղանք:
