ՀՀ նախկին վարչապետ, ՀԱԿ խմբակցության պատգամավոր Հրանտ Բագրատյանն այսօր Աժ-ում տեղի ունեցած հարցուպատասխանի ընթացքում մի շարք հարցեր ուղղեց էկոնոմիկայի փոխնախարար Վարդան Արամյանին, ով ներկայացնում էր ՀՀ կենսաթոշակային համակարգի բարեփոխումների փաթեթը:
Բագրատյանը մասնավորապես հետաքրքրվեց` ո՞ւր են հոսելու պետության գումարները, քաղաքացու՝ երկրից հեռանալու դեպքում վերադարձվելո՞ւ են նրա կուտակային ավանդները, թե՞ ոչ:
Ի պատասխան՝ Վարդան Արամյանը նշեց, որ բոլոր այդ որոշումները կայացնելու է ակտիվների կառավարիչը, և գլխավոր նպատակը մասնակիցների առավելագույն եկամտաբերության ապահովումն է:
«Մենք փորձելու ենք հետևել մի քանի սկզբունքների, օրինակ` դիվերսիֆիկացիա ապահովել, նվազեցնել ռիսկայնությունը»,- ասաց նա:
Անդրադառնալով Բագրատյանի այն հարցին, թե քաղաքացու՝ երկրից հեռանալու դեպքում վերադարձվելո՞ւ են նրա կուտակային ավանդները, էկոնոմիկայի փոխնախարարը դրական պատասխան տվեց:
ՀՀ նախկին վարչապետն իր հերթին նկատեց, որ Հայաստանում ներդրված համակարգը կրկնում է ՌԴ-ում գործող համակարգը, որի ձախողված լինելու մասին նշում են ՌԴ թե իշխող, թե ընդդիմադիր ուժերը: Վարդան Արամյանը շտապեց ուղղել վերջինիս` նշելով, որ մեր երկրում գործող համակարգը նման է ոչ թե ռուսական, այլ էստոնական համակարգին:
Հիշեցնենք, որ Հայաստանը բաշխողական կենսաթոշակային համակարգից բազմաստիճան կուտակային համակարգի անցումը կատարել է 2010 թվականից: 2011 թվականից գործում է կամավոր կուտակային, իսկ 2014-ից կգործի պարտադիր կուտակային համակարգը: