«Աշխարհում տարեկան 600 հազար երեխա է մահանում ռոտավիրուսի պատճառով»,- «Առաջին լրատվական»-ի հետ զրույցում ասաց «Մուրացան» մանկաբուժական կլինիկայի մանկաբույժ Սուսաննա Հարությունյանը: Նա նշեց, որ այն բավական արագ տարածվող վիրուսային ինֆեկցիա է:
«Վիրուսը հիմնականում «բնակվում» է աղիներում և առաջացնում է փսխումներ, լուծ, փորացավեր, ընդհանուր թուլություն: Այն փոխանցվում է սննդային ճանապարհով: Հիվանդությունը ունի մի քանի տարատեսակներ, սակայն սովորաբար առաջին հիվանդությունն է ամենաբարդն ընթանում: Հետագայում երեխան կարող է հիվանդանալ նաև հիվանդության մյուս տեսակներով, բայց արդեն ավելի թեթև կտանի դրանք: Երեխաները ռոտավիրուսով կարող են հիվանդանալ մինչև 5 տարեկանը»,- հայտնեց մանկաբույժը:
Մասնագետի խոսքով՝ հիվանդությունը կարող է տևել մի քանի օր և շատ հեղուկ օգտագործելու դեպքում ինքնուրույն անցնել. «Իհարկե, լինում են նաև բարդ դեպքեր, որոնք հիմնականում կապված են ջրազրկման հետ: Լինում են դեպքեր, երբ երեխան նաև փսխում է: Այդ ժամանակ երեխային պետք է տեղափոխել հիվանդանոց»:
«Ես շատ ուրախ եմ, որ Հայաստանում կատարվում է ռոտավիրուսի դեմ պատվաստում,- ասաց մանկաբույժը և հավելեց:- Գրեթե բոլոր երկրներում ռոտավիրուսը խնդիր է, և դրա դեմ պատվաստումներ կատարում են բոլոր զարգացած երկրներում: Պատվաստանյութը բավական թանկարժեք է և բարձր որակի: Ընդամենը երկու անգամ են կաթեցնում երեխայի բերանում: Հետագայում բարդություններ չեն առաջանում, հնարավոր է` թեթևակի փորլուծություն կամ փսխում»:
Հարությունյանի հավաստմամբ՝ պատվաստանյութը մոտ 90 տոկոսով նվազեցնում է հիվանդանալու հավանականությունը:
Հիշեցնենք, որ առողջապահության նախարարության որոշմամբ՝ հոկտեմբերի 1-ից մինչև երեք ամսական երեխաները կպատվաստվեն ռոտավիրուսի դեմ:
