ԱՄՆ-ում շարունակում է աճել վտանգավոր և հյուսիսամերիկյան մայրցամաքի համար հազվադեպ հիվանդության` Արևմտյան Նեղոսի տենդի զոհերի թիվը: Ինչպես այսօր հայտնել են հիվանդությունների վերահսկման և կանխարգելման Ազգային կենտրոնների ներկայացուցիչները` ներկայումս այդ վիրուսից արդեն 118 մարդ է մահացել:
Մասնագետների խոսքով` տենդի ներկայիս բռնկումն ամենալուրջն է ԱՄՆ-ի պատմության մեջ: Վերջին մի քանի շաբաթում ԱՄՆ-ի բոլոր նահանգներում, բացի` Ալյասկայից և Հավայիից, արձանագրվել է հիվանդության 2 636 դեպք: Վիրուսից տուժածների մոտ 40 տոկոսը Տեխասում են: Միայն վերջին շաբաթում ԱՄՆ-ում վարակվածների թիվն ավելացել է գրեթե մեկ երրորդով:
Արևմտյան Նեղոսի տենդն առաջին անգամ հայտնաբերվել է Ուգանդայում 1937-ին: Հիվանդության նախանշաններն են` ջերմություն, գլխացավ, հոգնածություն և ցավ մարմնում, սրտխառնոց, փսխում, երբեմն` մաշկային ցան, ավշահանգույցների այտուցվածություն: Դրա դեմ վակցինա չկա: Ինչպես նշում են բժիշկները` առավել վտանգված են 50 տարեկանից մեծ մարդիկ:
