ՀՀ գերատեսչությունները միլիոնավոր գումարներ են ծախսում իրենց աշխատակիցներին այս կամ այն կարևոր և ոչ կարևոր արտասահմանյան գործողումներին ուղարկելու համար: Ընդ որում, շատ հաճախ մեր պաշտոնյաները նման գործուղումներին իրենց հետ պետության միջոցների հաշվին տանում են նաև գեղեցիկ սեռի իրենց ներկայացուցիչներին: Իսկ արտասահմանում, ասենք՝ որևէ համաժողովի ժամանակ, որտեղ պետք է ջանք թափեն, որ օտարեկրյա ներդրողներին համոզեն՝ ՀՀ-ում ներդրում կատարել, իրենց ճոխությունների հետևանքով հակառակ ազդեցությունն են թողնում: Ամենայն հավանականությամբ, դա նույնպես ազդեցություն է ունեցել կիսամյակի տվյալներով օտարեկրյա ներդրումների ծավալների մոտ 40% կրճատման վրա:
«Առաջին լրատվական»-ը ՀՀ ֆինանսների նախարարությունից հետաքրքրվեց, թե ՀՀ գերատեսչություններին որքան գումար է հատկացվում իրենց գործուղումների և շրջագայության ծախսերի համար: Այսպես. գործուղումների համար ամենաշատ գումար բնականաբար հատկացվում է արտաքին գործերի նախարարությանը՝ 139.9 մլն դրամ, դրան հետևում են ՊԵԿ-ը՝ 60 մլն դրամ, էկոնոմիկայի նախարարությունը՝ 16.3 մլն, առողջապահության նախարարությունը՝ 6.7 մլն, քաղավիացիայի գլխավոր վարչությունը՝ 5 մլն դրամ, ֆինանսների նախարարությունը՝ 3.4 մլն, սփյուռքի նախարարությունը՝ 3.3 մլն, կադաստրի պետական կոմիտեն՝ 2.7 մլն, գյուղնախարարությունը՝ 2.6 մլն, էներգետիկայի և բնական պաշարների նախարարությունը՝ 2.26 մլն, արդարադատության նախարարությունը՝ մոտ 2 մլն, քաղաքաշինության նախարարությունը՝ 1.27 մլն, կրթության և գիտության նախարարությունը՝ 1.09 մլն, մշակույթի նախարարությունը՝ 662 հզ., բնապահպանության նախարարությունը՝ 556 հզ., և այս առումով «ամենաաղքատ» գերատեսչությունը տարածքային կառավարման նախարարությունն է՝ 416.9 հզ. դրամ:
